New Delhi, Nailur 13
U Myntri Rangbah ka Delhi, u Arvind Kejriwal u la lait na patok ha ka Sngi Thohdieng hadien ba ka Ïingbishar kaba hakhliehduh jong ka ri (Supreme Court) ka la ai jamin ïa u ha kaba ïadei bad ka jingujor ka Central Bureau of Investigation (CBI) halor ka Delhi Excise Policy bad kane ka jingïoh jamin jong u ka dei ha ryngkat ki kyndon.
Hynrei ka Ïingbishar lyngba ki nongbishar kiba kynthup ïa u Justice Surya Kant bad Ujjal Bhuyan ka la buh ki kyndon ha kaba u Kejriwal u hap ban bud kumba u la hap ban bud ïa ki kyndon kiba la buh da ka Ïingbishar ha ka por ba u ïoh jamin ha ka 12 tarik Naitung, 2024 ha kaba ïadei bad ka jingujor ka Enforcement Direc-torate.
Ki kyndon kiba la buh da ka Ïingbishar ha kane ka jingïoh jamin ki long ba ïa u Kejriwal yn ym shah ba un leit jngoh ïa ka shlem treikam u Myntri Rangbah bad ïa ka Delhi Secretariat. La khang ruh ïa u Kejriwal ban soi ïa ki kot ki sla lait noh tang lada donkam ban ïoh ïa ka jingmynjur jong u Lieutenant Governor of Delhi.
Shuh shuh la ong ba u Kejriwal um dei ban kren ei ei halor ka bynta jong u halor kane ka mukotduma bad u Kejriwal um dei ban ïakren bad kino-kino ki nongsakhi ha kaba ïadei bad kane ka mukotduma lane ba un ïoh peit ïa ki kot ki sla kiba ïadei bad ka mukotduma.
Kum ban pynkynmaw, u Kejriwal la shah kem nyngkong ha ka Enforcement Directorate ha ka 21 tarik Lber, 2024, bad hadien kane u la shah kem ha ka CBI ha ka por ba u la don lypa ha ka jingshah set ha ka 26 tarik Jylliew, 2024 ha kaba ïadei bad ka jingkynnoh kaba ïadei bad ka Delhi Excise Policy.
Ha ka 10 tarik Jymmang, 2024, ka Supreme Court ka la ai jamin shipor ïa u Kejriwal ha kaba ïadei bad ka jingujor ka Enforcement Directorate namar ka jingdon ka ilekshon sha ka Ïingdorbar Thawaiñ Lok Sabha. Ynda u la wanphai biang sha patok hadien ka ilekshon, ka Supreme Court ka la ai jamin biang ha kaba ïadei bad ka jingujor ka Enforcement Directorate ha ka 12 tarik Naitung 2024.
