Shillong, Nailur 12
U District Sports Officer (DSO) ka Ri Bhoi District u Bah Bobby L. Nongbet u la pynpaw ka jingai khublei ïa ki lai tylli ki skul na ka thaiñ Ri Bhoi kiba la lah ban pynpaw ïa ka jingtbit ha ka lympung ïalehkai 63rd Subroto Cup International Football Tournament 2024 kaba la poi sha kaba kut ha ka nongbah Delhi.
Kine ki long ka Nongjri Presbyterian Secondary School kaba la rah ïa ka nam lahduh ha ka Under -15 ha Bangalore, kumjuh ka Mynken Higher Secondary School kaba la shah rem ha ka final jong ka Under -17 shynrang bad ka Christian Higher Secondary School kaba la shah rem noh ha ka quarter final jong ka Under-17 ki kynthei.
“Ha kaba nyngkong nga pynpaw ka jingïaroh ïa baroh lai tylli kynhun kiba la lah ban ïalehkai bha na ka bynta ban ïoh rung sha kane ka lympung ïalehkai International Subroto Cup. Kine ki kynhun ki la ïalehkai bha naduh ka jingïakhun ha Bangalore ba ngi la lah lah ban rah ïa ka nam lahduh, kumjuh hangne ha nongbah Delhi ki kynthei ki la shah rem noh ha ka quarter final bad ki shynrang ki la shah rem noh ha ka final. Kane ka pyni ïa ka myniem ka jingtrei shitom ka jong ki khynnah,” u la bynrap.
Utei u DSO bad uba long ruh u coach ha ka phutbol, u la pynpaw ïa ka jingkhmih lynti ba baroh ki skul na ka thaiñ Ri Bhoi kin dangïai trei shitom nangne shakhmat khnang ki ïoh biang sa shisien ban rung biang sha ka Interna-tional Subroto Cup. “Ngi kyrmen ba ngin wanphai biang sa shisien sha kane ka lympung ha baroh lai tylli ki kyrdan ïalehkai.”
U Bah Nongbet um lah khlem da ai khublei ïa ki paidbah kiba la wan ban ai jingkyrshan ïa baroh ki kynhun ha manla ki jingïakhun jong ki ha Bangalore bad kumjuh ha ka nongbah Delhi namar dei lyngba ka jingkyrshan jong ki ba ki kynhun ki sa lah ban ïalehkai bha. “Nga shim ïa kane ka kabu ban ai khublei ïa ka tnat ïalehkai jong ka Sorkar Jylla kaba la pynbiang nadong shadong ban pynbiang ïa baroh ki jingdonkam ïa kine ki kynhun.”
