Moscow, Nailur:
U President ka Russia, u Vladimir Putin, ha ka Sngi Palei u la maham tyngeh ia ka thaiñ West halor ka jingailad ia ka Ukraine ba kan pyndonkam da ki ‘namding ‘Long Range Ballistic Missile’ kiba khlaiñ bor bad kiba lah ban pynher jngai, kiba ka Ukraine kan sa pyndonkam ha ka jingiakhun thma pyrshah ia ka Russia. Kumta, la ong ba u Putin ha katei ka sngi u la maham bad byrngem tyngeh ia ka NATO bad ka US halor katei ka jingai jingkyrshan ia ka Ukraine ban thombor bad pynhiar kput ia ka Russia ha kane ka sien ïakhun thma.
Haba iadei bad kane, u Putin u la ong ba lada ka NATO, ka US bad ka UK bad baroh ki ri ka dew-bah Europe ki ai jingkyrshan ia ka Ukraine, kane ka pyni ba ka jingiakhun thma jong ka Russia ka long pyrshah ia baroh kitei ki ri, ym tang ia ka Ukraine marwei. Kumta kane ka pyni ruh ba kitei ki ri jong ka NATO, ka US bad ki ri ka Europe kin hap ban ïakhun thma pyrshah ia ka Russia, ha kaba ka Russia ruh kan hap ban pyndonkam noh da kiwei ki rukom ïakhun thma lada baroh kitei ki ri kin ieng ban ialeh pyrshah ia ka marwei.
Namar la ong ba wat la kitei ki ri kim shym pynpaw pyrshah ialade, hynrei la iohi pat ba kiba bun ki ri khamtam ka US, ki iasnoh kti lang bad ka Ukraine ban ioh pynkhyllem ia ka Russia ha kane ka thma.
