Shillong, Nailur 13
Ka Sorkar Jylla ka la ong ba ki don bun ki daw kiba pynlong ban kiew dor ki mar bam naduh ki kynja ba long khaw, dai bad jhur ha kaba ka jinglong jaka lum ka Jylla Meghalaya ruh ka nang pynkiew wat ïa ka bai kit mar ha kaba kane ka la ktah lang ïa ki nongthied nongpet ha kane ka Jylla.
Ha u kyrwoh ba la pyllait ha ka Sngi Thohdieng lyngba u Myntri ka tnat marbam mardih u Bah Comingone Ymbon lem bad ka tnat marbam mardih ka Jylla, la ong ba ka tnat Food Civil Supplies and Consumers Affairs bad ka Sorkar ka la shim ki lad bam tem ïa ka jingkiew dor ki mar ki mata kiba kongsan (essential commodities).
Ka jingbym tista bad slem ban hap slap ha ki bynta jong ka ri ka pynlong ruh ban jia ka jingtyrkhong um ki jaka rep kaba ktah ïa ka jingpynmih khaw bad jhur. Ki don ruh kiwei pat ki thaiñ ha kaba ka jur ka jinghap slap bad shlei um kaba la pynjulor ïa ki jingthung-jingtep bad pynlong ban duna ka jingpynmih ïa ki mar rep.
La ong ba ka jingnang bun briew ha India kaba la kot sha ka 1 billion ngut ka buh jingeh ban pyndap ïa ka jingdonkam ïa ki mar bad ïalam pynban sha ka jingkiew dor.
Ka Sorkar ka la ong ba ka jingkiew dor ha ka liang ka bai bylla bad bai kit mar kit mata ka la nang pynkhia ïa ka jinglong-jingman ka dor ka mur bad ka jinglong lum ki jaka ka nang pynkiew ïa ka bai kit bad kane ka ktah lang ïa ki nongthied nongpet.
Halor ki lad ban ym kiewdor, ka Sorkar ka la ong ba ka tnat Food Civil Supplies and Consumers Affairs ka la shim shibun ki lad ban pynneh ïa ka dor bad ban pyntikna ban don ki mar ki mata na ka bynta ka jingdonkam ki nongshong shnong naduh ka pyntreikam ïa ka Price Monitoring System (PMS) ha man ki district ban pyni ïa ka dor ka mur ki mar ki mata khnang ba ki paidbah kin ïoh ka dor kaba ki kot bor ban thied.
La ong ba ka Sorkar ka la peitngor ruh ïa ka dor jong kumba 22 haduh 38 tylli ki mar bam mar dih naduh ka 1 tarik Nailar, 2024.
Na ka liang u Myntri ba dei khmih, u Bah Comingone Ymbon u la ong ba ka Sorkar ka don ka thong na ka bynta ki paidbah nongthied nongpet bad ka thong kaba hakhmat jong ka tnat ka long ban pyntikna ba ki mar bam mar dih kin long kiba kot bor ïa ki paidbah ban thied.
U Bah Ymbon u la ong ba ka tnat ka kloi ban khanglad ïa ka jingdie rem bad jinglehthok ïa ka dor ka mur bad ban pyntikna ba ki mar bam mar dih kim dei ban duna ha ïew ha hat.
U la ong kum u Myntri, u kular ïa ki paidbah ka Jylla ba ka Sorkar kan bteng ban trei ban pyntreikam bha ïa ki aiñ bad ki mat treikam na ka bynta ka bha ka miat jong baroh ki nongshong shnong.
