Shillong, Nailur 13
Ka Voice of the People Party (VPP) ha ka 13 tarik u Nailur 2024 ka la mih paidbah biang sa shisien ban pynlong da ka jingshong kyllaiñ mungor kaba shisngi ban pyrshah bad pynsngew sha ka Sorkar ïa ka jingkiew dor ki mar bam-mar dih hapoh ka Jylla ïa kaba la pynlong ha Madan Malki, Shillong kaba la sdang naduh ka por 10 baje mynstep haduh ka por 5 baje janmiet jong kane ka sngi.
Kane ka jingmih shakhmat jong ka VPP ban pynlong da ka jingshong kyllaiñ mungor ha madan ha ryngkat ka jingrah ïa ki jingthoh kiba la thoh ka long ban pynsngew sha ka Sorkar halor ka jingkiewdor eh shaba palat jong ki marbam-mardih ka dei hadien ka jingbym ïohlad jong ka seng ban kren ne ïatai eiei hapoh ka ïing Dorbar Thawaiñ ka Jylla halor kane ka mat kaba la ktah shikat dei eh ïa u duk u suk hapoh ka Jylla.
Haba kren sha ki lad pathai khubor, na ka liang u President ka VPP, u Bah Ardent Miller Basaïawmoit, u la ong ba ka liang u Myntri ba dei khmih ïa ka tnad Food & Civil Supply, u Bah Comingone Ymbon, u la ai ïa ka jubab kaba na ka liang ki MLA ka liang pyrshah kim shym la ïoh ban ïakren-ïatai ne kylli eiei halor ka daw kaba la pynlong ïa ki mar bam mar dih hapoh ka Jylla ba kin kiew dor shaba palat.
“Kum ka dak ban pynpaw ïa kata ka jingsngewkhia ka jong ngi ïa kane ka jingkiew dor kaba la palat pud kaba la ktah ïa kiba duk ba suk ha kane ka Ri kaba ieid eh ka jong ngi, kumta ka dei na kata ka daw kaba ngi la pynlong ïa kane ka prokram ha kane ka jaka”, la ong u Bah Ardent.
Haba kylli hato ki don ki daw sha lyndet jong ka jingrem eh ki marbam-mardih tang ynda ki la wanpoi hapoh kane ka Jylla, u Bah Ardent u la ong ba kata ka dei ka jingkylli kaba na ka liang ka VPP ruh ki kwah ban buh ïa ka Sorkar ba kan jubab.
“Kata ka dei ka jingkylli kaba ka Sorkar kan hap ban jubab kaba la pynlong ïa ki marbam-mardih ba kin kiewdor bad ka dei na kata ka daw ba ngi lah rah ïa kane ka mat hapoh ka Ïing Dorbar Thawaiñ ka Jylla ban ïakren bad ban ïoh pynsngew”, ong u Bah Ardent.
U Bah Ardent u la ai nuksa ruh ha kaba ïadei bad ka dor jong ka dohmasi ha Dimapur ha kaba ka dor ka dei T. 300 katba ka dor jong ka dohmasi hapoh kane ka Jylla pat ka dei T. 500 ne T. 600 kaba long ka dor kaba arshah.
U la ong ba ym lah ban leh ba ka daw ka jingkiew dor eh ki marbam ka dei na ka daw ka jingdon bun ki khyrdop lum khajna kiba dei jong u Syiem, ka District Council, ki pulit kiba ïeng laiñ ha ki lynti-syngkieñ.
“Ki don shibun eh ki daw kiba lehse kiba pynlong ïa ki marbam-mardih jong ngi ba kin kiewdor, ka dei namar kata ka daw ba ngi kwah ban ïakren bad ka Sorkar ba kan wad bad ai beit thik da ki jingkheiñ-jingdiah ne ka dor ban ïanujor pat bad kiwei ki Jylla.
Shuh shuh u Bah Ardent u la ong ba bunsien ki nongrep ki ju die ïa ki mar-rep jong ki ha ka dor kaba tad hynrei kum ki paidbah kiba thied bad bam ïa kine ki mar-rep na Ïewduh, kim ju ïoh ha ka dor kaba tad.
U la ong ba ha ka jingshim bad ka jinglap, ka long ba ki don ki mar-mata kiba ka Sorkar ka la buh da ka dor hynrei hapoh ka jaka kaba la die ïa kine ki mar-mata, kam ïadei bad kata ka dor ba la buh da ka Sorkar ha kaba kane ka pyni ba ka Sorkar ka la shu pyndep rukom ban buh ïa kita ki dor hynrei kam don satia ïa ka jingbuddien halor kane.
“Ka daw tynrei hi ka dei ka jingphiel bad ka jingbymlah jong ka Sorkar ban shimkhia ha ka ban tehlakam ïa ka jingkiewdor ki marbam-mardih ha kane ka Jylla”, bynrap u bah Ardent.
U la pyntikna ruh ba kane ka jingshong kyllaiñ mungor bad ka jingïakhih jong ka seng halor ka jingkiewdor ki marbam-mardih kan nym dei tang shisien hynrei na ka liang ka seng kan sa shim da ka rai ban pyrkhat ïa ki sienjam kiba na ka liang ka seng kan shim nangne shakhmat ban buddien halor kane khnang ba ka jingïakhih jong ka seng kan long kaba jop bad ka jingmyntoi ïa ki paidbah kiba duk hapoh ka Jylla.
U la ong ruh ba ka long kaba sngewsih ban ïohi ba hapoh ka Ïingdorbar Thawaiñ ka Jylla kaba dei ka jaka ban ïatai ïa ki jingeh, kum ki seng kiba shong sha ka liang pyrshah kiba dei ban ïoh ïa ka lad kaba kham bun ban ïakren ïa ki mat kiba ktah ïa u paidbah hynrei kaei kaba la ïohi hapoh kane ka Jylla pat ka long da khongpong ha kaba ka bynta jong ki liang pyrshah la shah knieh noh ha kiba don ha ka liang synshar.
“Haba ki la don ha ka Sorkar ki la dei ban shu ïakynduh ïa ki Myntri kiba dei peit ïa ki tnad bad ïa u Myntri Rangbah hynrei balei ba hap ban leh kumne? Kane ka dei ka jingpyrshang jong ki ban khanglad ïa ki MLA ka liang pyrshah”, bynrap u Bah Ardent.
