Kane ka long ka jingïohi jong nga haba ïa dei bad ka jingai jait kmie bad ka ai jait kpa ha ngi ki Khasi. Ha ka jingshisha u Rangbah ne u khatar bor Khasi mynshuwa ki ju bet symbai haba bun ki lok u pynïoh khun ha kylleng ki shnong ka Bri U Hynñiewtrep. Te shu shim lada uwei u shynrang u la shong tnga 10 ngut bad u ïohi ki khun lai ngut saw ngut na kawei ka tnga kiba ai jait kmie. Te kine ki khun baroh shiphew ngut na ki tnga ki ai jait beit sha ka kmie. Ha ka jingshisha kine ki khun na ki shiphew ngut ki tnga kim ïa dei shipara trai. Namar kim dei na ujuh u kpa. Wat la ki ïa pher ka jait jong ka kmie. Namar shipara trai la ñiew beit tang ïa ki khun na ujuh u kpa. Hynrei lada kano-kano ka kynthei ka ïoh tang lai ngut saw ngut ki tnga ba ïa pher ki khun kim ïa dei shipara trai, namar ba ïa pher ki kpa. ïa kine la ñiew noh kum ki shipara ar kpa lai kpa namar kim ïa dei shipara trai bad ym dei na ujuh u kpa. Te haba kumne ki khun ki la ïa heh ïa san bad ka dei ka por ban ïa shimti ïa ka jinglong kpa longkmie. Namarkata, haba ïa pher ka jait ka kynja jong kine ki khun kiba ïa shong ïa sah ha ki jaka bapher bapher ka Ri. Te haba ki la ïa jngai bad ïa pher ka jait ka kynja, te phin mynjur ba kin don beit kiba ïa poi kha shipara trai na ujuh u kpa. Te kane kam dei kaba mynsaw ïa ka kur ka jait bad ïa ka imlang ka sahlang na ka jaitbynriew ? Hynrei lada ai jait sha u kpa kine ki khun baroh 40 ngut ki ïa tip ba ki la long shipara trai na ujuh u kpa wat la ïapher ki kmie ruh. Kumta kim nud ban ïa poi kha namar baroh 40 ngut ki la ai jait sha u kpa ba ai ïa u symbai. Dei na kane ka daw nga nud ban ong ba ka ai jait kmie ka kham palat ka ïa shong sang ban ïa kiba ai jait kpa.
C. B. Iawphniaw
