Shillong, Nailur 13
U Myntri ka tnat Bording ka Jylla, u A.T Mondal u la ong ba ka Meghalaya Energy Corporation Limited (MeECL) katba lah kan pyrshang ban pynduna ïa ka jingduhnong da kaba kham pynbha ïa ka jinglah jong ka ha ka rukom treikam ban ai jingshakri khamtam ban pynbiang ïa ka bording ilektrik bad ruh ban pynmih pisa.
U Mondal u la pynpaw ïa kane hadien ba ka kaiphod Comptroller and Auditor General of India (CAG) ka la kdew ba napdeng ki 14 tylli ki kompani kiba hap hapoh ka jingpeit ka Sorkar, ki ar tylli ki kompani kita ka Meghalaya Power Generation Corporation Limited (MePGCL) bad Meghalaya Power Distribution Corporation Limited (MePDCL) ki don ha ka jingduhnong kaba 65% lane T.371.17 klur na ka T.572.28 klur.
U Mondal u la ong ba kam dei ka kam kaba suk hynrei khlem da kren shaphang ka jingpynmih bording ilektrik, ka jingsam bording bad ka jingpynïaid ïa ki laiñ ilektrik, kiwei ki Jylla ruh ki mad ka jingeh kaba long ïasyriem bad kaba kham khia eh ka dei ka jingduhnong namar ka A&TC, ka jingpynsah khlem siew ïa ka bai ilektrik kaba la pyndonkam.
Kumta u la ong ba ka la don ka sienjam kumno ban kham pynduna ïa kine ki jingduhnong lyngba ki lad bapher bapher kiba la shim.
U Mondal u la ong ruh ba na ka liang u Myntri Rangbah u Conrad K Sangma u la buhthong ba ka bording ilektrik ka dei ban poi sha baroh ki nongshong shnong. Kane hi ka dei ka thong kaba hap ruh ban thied bording ha ki por ba tyrkhong ka mariang ha kaba ka Sorkar Jylla ruh ka ïarap ha ka rukom kaba dei ban leh bad ka jinglut ruh ka kham bun.
U Mondal u la ong ba lada kat kane ka pisa ym donkam ban ai ïa ka MePDCL, ym lah mutdur katno ki surok, jaka sumar bad ki skul bad kolej la lah ban tei. Kumta u Myntri Rangbah u kwah ban don ki jingpynkylla ban kyntiew ïa kine lai tylli ki kompani hapoh ka MeECL.
Haba kylli la ka MeECL kan don jingpyrkhat ban kham pynduna ïa ki nongtrei, u Mondal u la ong ba ym pat don kano-kano haduh mynta hynrei kaba kongsan ka long ba donkam shuh ban thung kum ki Engineer, Junior Engineer bad kiwei kiwei ki kyrdan kynthup ki Jugali.
