Mawkyrwat, Nailur 13
Ki paidbah jong ka thaiñ Riwar ryngkat ka Synjuk San Shnong Manad Area (SSSMA) kiba kynthup ïa ka shnong Mawbidong, Pynden- lyngdoh, Pyndensoh-lang, Manad bad Lummawbah, sa shisien pat ki la mih shakhmat ban dawa na ka Sorkar ba ka dei ban siang rong noh ïa ka surok Photjaud, Mawbidong kaba don kumba 5 km kaba ki paidbah kane ka dong ka thaiñ ki la angnud la slem bad ki la ju dawa na ka por sha ka por na ka Sorkar.
Ha ka jingïalang kaba la long ha ka step jong ka 13 tarik u Nailur 2024 ha Ïew Pyndenlyngdoh, ki paidbah ryngkat ka Synjuk da kawei ka sur ki la rai ba lada ka Sorkar kam sngap bad kam siang rong noh ïa kane ka surok hapoh jong une u snem kaba u MLA ka thaiñ ruh u la rah ban pynsngew ïa kane ka mat ha ïingdorbar thawaiñ ka Jylla, na ka liang ki paidbah ha kane ka kynti ba mynta kin leh bad pyni shisha da ka kam ha kaba kin ym shim bynta shuh ban thep ‘vote’ ha ka ilekshon MDC bad kin leit tur ruh sha Secretariat ha ryngkat ki lama ïong.
Ka jingsniew palat ka surok ka la wanrah jingeh bad ktah ruh ïa ka ïoh ka kot jong ki paidbah na ka bynta ban pynpoi ïa ki mar rep sha ki ïew ki hat bad ha Mawkyrwat, ki paidbah kane ka thaiñ ki mad jingeh shibun khamtam ha ka por slap ha kaba bunsien ki kali jong ki ki sahkut noh tang shiteng lynti bad kaba kham sngwsynei shuh-shuh ka long ïa kiba pang ba shitom bad ki longkmie ba armet ha kaba ka ju don ki jingjia ba sngewsih ba ki khyllung ba dang kha bad ki longkmie ba armet ki khlad noh tang shiteng lynti shwa ban poi sha ki jaka sumar kum ha Mawkyrwat kumba ïathuh da ki ‘riew rangbah bad ki longkmie.
Na ka liang u Bah Redy Shylla, President Synjuk haba kren sha ki lad pathai khubor u la pynpaw ïa ka jingsngew bynñiaw ha kaba ïadei bad kane ka surok kaba ki paidbah ki la angnud la slem.
U la ïathuh ruh ba dang ha ka ilekshon MP ki paidbah da kawei ka sur ki la ïa rai ban ym ïashim bynta shuh ha ka jingthep vote namar kim sngew myntoi shuh ban jied ïa ki nongmihkhmat haba ïa ka roi ka par kim don bynta.
“Ngi la maham ha kato ka por khnang ba ka Sorkar kan sngap ïa ka jingdawa namar kane kam dei ka skhim shimet hynrei ka dei ka jingdawa na ka bynta u paidbah,” ki la ong.
Kumta na ka liang ki paidbah naduh ki longkmie, ki nongñiah kali ki, nongrep bad ka Synjuk sa shisien ki buh ka jingkyntu ïa kaba jur ïa ka Sorkar ba kan sngewsynei lem ïa ki paidbah kane ka dong ka thaiñ bad ki la pynpaw ruh ba la kumno-kumno ka Sorkar ha ka Dorbar Tlang ka la dei ban pynurlong noh ïa kane ka jingangnud ki paidbah.
Ka Synjuk ka ai khublei kyrpang ruh ïa u MLA, u Bah Renikton Lyngdoh uba la shimkhia ban rah bad pynsngew ïa kane ka mat ha ïngdorbar thawaiñ ka Jylla.
Kiwei pat kiba ai jingkren ha kane ka sngi ki long Kong Meralcy Nongbsaw, Bah Vicstolan Lyngdoh, Bah Kenesjone Nonglait bad kiwei-kiwei.
