New York, Nailur:
Uwei u nongshong shnong jong ka New York, uba la don 40 snem ka rta, la ong ba u la shah mudui da ka mukotduma haba iadei bad ka kam runar kaba u la leh da kaba u la pyndih drok bad leh beijot ïa ki kynthei kiba u la ïakynduh online lyngba ka website ‘Sugar Daddy’. Ki pulit ki la kem noh ia u Andrew J.Gallo ha ka Sngi Balang bad la pynngat ia u hapoh ki kyndon pynkheiñ aiñ jong ka jingleh be-ijot bad kumjuh ka jingpyndonkam be-aiñ ia u drok bad ka kyiad bad ruh ban pynngop ne ialam bakla ia ki khynnah rit. Ia mynta shipor une u briew u dang don ha patok ha ryngkat ka bai bah jamin jamin kaba T.5 lak lada don kiba kwah ban pyllait jamin ia u shipor katba ki pulit bad ka ïingbishar kim pat shim ia ka rai ba khatduh ban pynshitom halor katei ka jingleh pynkheiñ aiñ jong u.
La iathuh ba u Gallo, u la pyndih drok bad leh be-ijot ia kumba 6 ngut ki kynthei naduh ka rta 17 haduh 30 snem tang hapoh kine 5 bnai ba la dep. Ka jingtohkit ka la pynpaw ba u Gallo, uba pynpaw kyrteng ialade ha katei ka website kum u “DREWSTER420” ha ka ‘SugarDaddiesMeet.com’, u la khleh ha ka jingdih kaba u la ai ia kitei ki kynthei da ki dawai pynbuaid kum u Methamphetamine, Ecstasy bad Cocaine. Kumta, la ong ba ha ka por ba u iakynduh bad shong kai bad kitei ki kynthei, u la ai ia kitei ki jingdih lane ka waiñ kaba la dep khleh dawai pynbuaid bad dei ha katei ka rukom ba u la ioh ban shim kabu bad pyniohthiah suk ia kitei ki kynthei bad u la ioh ban leh be-ijot da kaba suk namar ka jingbym tip briew shuh jongki tang mar ia ioh ding ia katei ka jingdih kaba la khleh dawai pynbuaid.
Ki nongmudui ki la iathuh ba kitei ki nongshah batbor kim lah ban khih ne khie naba thiah ha katei ka por ba ki ioh dih ia katei ka jingdih ba la ai da utei u briew bad kumta kim lah ban ïada ialade na ka kti jong utei u ‘riew shim kabu.
Namarkata, ka nongïasaid aiñ na Bucks County- ka Jen Schorn ka la kdew ba katei ka jingleh jong u Gallo ka la ktah jur ia ka jinglong-jingman jong kitei ki kynthei kiba ngat ha katei ka apot bad ka long ruh ka bym lah ban pdiang ba ki kynthei kin shu shah shim kabu ha katei ka rukom. Nangta ruh katei ka nongïasaid aiñ ka la dawa ba dei ban ai da ka jingpynshitom kaba tyngeh ia utei u briew, wat la um shym leh ia ka kam batbor da kaba jubor hynrei ka jingshim kabu bad jingthmu jong u, ki ia ryngkat hi kumjuh kumba long ki nongbatbor namar utei u briew u shim kabu bad pynngop ia ki kynthei lyngba katei ka jingiakynduh ‘online’ tang ba un ioh ban pynsngewbha ia lade hynrei khlem da pyrkhat pat ia ka long-rynïeng bad ka jinglong- jingman jong ki kynthei.
Ha kawei pat ka jingjia kaba la jia nyngkong eh ha ka miet Khristmas jong u snem ba la dep, la ong ba kawei ka kynthei na New Jersey, kaba dang 24 snem ka rta, ka la iakynduh ia u Gallo, ban iabam ja miet lem bad u. hynrei ka la iathuh ba hadien ba ka la dih ia ka jingdih ‘Margarita’ ba la pynkhreh da u Gallo, ka la sngethuh ba kam beit shuh ka jingmut jingpyrkhat bad kumba ka la dap da ka jingtieng ba ioh kan iap iohthiah noh hangta, ioh kan ym lah kyndit shuh. Ki pulit ki ngeit ba ia katei ka jingdih la khleh da ki kynja dawai ‘methamphetamine’ ban pynbuaid kloi ia ki nongdih bad kin ym lah ban khih ne leh eiei haba dih ia ka. Kumta, la ong ba u Gallo u la leh hi kumtei kumjuh ia baroh kitei ki 6 ngut ki kynthei kiba u la iakynduh lyngba katei ka rukom bad jan baroh na ki, kiba la iap iohthiah syndon hynrei don pat ki bym shym la ioh thiah, pynban kim lah shuh ban pynkhih ia ka met ne kti- kjat jongki hadien ba ki la dih ia katei ka jingdih ba la ai da utei u briew bad kumta ki hap ban shu shah suk katba utei u riew shim kabu u leh ia ki.
Haba iadei bad kane, la ong ba ki la don haduh 8 tylli ki ejahar ba la ujor pyrshah ia u Gallo halor katei hi ka kam leh be-ijot bad kam batbor ia ki kynthei, hynrei 6 tylli ki dei kiba u shu pynngop da kaba ai ia kitei ki jindih pynbuaid. Katba, don ruh ki jingkynnoh ba la ong ba utei u briew u ju pyndih kyiad wat ia ki khynnah ba dang rit ruh hynrei ym shym la ioh jingtip eiei, la u leh eiei ne em pat ia ki.
Kumta, ki bor pynïaid bad ki pulit ki dang ialeh ban wad bniah bha sa ia kiwei pat ki nongshah batbor ha utei u briew bad kumjuh ruh lyngba jong kito kiba don jingiadei ne iadei kam lang bad u Gallo.
