Shillong, Nailur 13
Ka lympung ïalehkai Big Futsal Fest jong ka Big FM ka la jan poi artad sha kaba kut ha kaba ka AG Meghalaya bad ka Meghalaya Secretariat Home Guards ki la lah ban pynthikna ban jam sha ka final.
Ha ka jingïakhun semi final kaba la long ha ka Sngi Thohdieng, ka AG Meghalaya ka la pynliem noh ïa ka MeECL lyngba ka tie-breaker da 3-1 kol.
Haduh kaba kut ka jingïalehkai semi final jong kine ki kynhun ki la ïakhaid mar 4-4 kol. Kumba ka paw ka AG Meghalaya bad ka MeECL ki la ïalehkai bha naduh kaba kaba sdang bad ka long ka jingïa-lehkai kaba itynnad bad kaba pynshoh biej ïa ki nongpeitkai.
Ha ka jingïalehkai ba ar, ka MIMHANS ka la wanrah ïa ki nongkyrshan kiba shlur hynrei sngewsih ba kam shym la lah ban ïalehkai bha. Kumta kane ka kynhun ka la shah rem noh haduh 10-2 kol ha ka Meghalaya Secretariat Home Guards bad u Fivestar Shylla u la thep haduh 5 kol.
Ka jingïakhun final na ka bynta ka Big Futsal Fest hapdeng ka AG Meghalaya bad ka Meghalaya Secretariat Home Guards kan long ha ka por 4 baje janmiet ha madan ïalehkai Thrive Sports Arena, Langkyr-ding.
Ka Big Futsal Fest ka dei ka lympung ïalehkai na ka bynta ki shlem treikam jong ki tnat sorkar lem bad ki ‘riew shimet ban kyntiew ïa ka Futsal ha kane ka nongbah da kaba thaw ïa ka tamasa jong kane ka lympung.
