Imphal, Nailur:
Ka sorkar kmie ha ka sngi Thohdieng ka la aipor haduh ka 20 tarik, Naiwieng sha ka Commission of Inquiry na ka bynta ban phah ïa ka kaiphot ha kaba ïadei bad ka jingtohkit jong ka halor kiba bun ki jingïakynad kiba la jia ha Manipur kiba la shim ïa ka jingim jong palat 220 ngut ki briew haduh mynta. Ka Commission, ba la khlieh da u Chief Justice barim jong ka Gauhati High Court u Ajai Lamba, ka dei kaba la buh ha ka 3 tarik, Jylliew, 2023.
Kane ka kynhun tohkit, kaba kynthup ruh ïa u IAS ophisar uba la shongthait u Himanshu Shekhar Das bad u IPS ophisar uba la shongthait u Aloka Prabhakar, ki la shah thung na ka bynta ban pynlong ïa ka jingtohkit kaba bniah ha kaba ïadei bad ki jingïakynad kiba la neh slem bad kaba la ktah ïa ki dkhot jong ki kynhun jaitbynriew bapher bapher, kaba la sdang ha Manipur ha ka 3 tarik, Jymmang, 2023.
Ka Commission of Inquiry ka la dei ban phah ïa ka kaiphot sha ka sorkar kmie kham kloi katba lah hynrei kam dei pat ban slem palat ïa ki hynriew bnai na ka tarik ba la buh hashwa”. Katkum ka shithi ba la ïohpdiang hadien, la ong, “Ka Commission ka la dei ban phah ïa ka kaiphot sha ka sorkar kmie kham kloi katba lah hynrei kam dei pat ban slem palat ïa ka 20 tarik, Naiwieng.”
