Da ka ‘1st War Jaiñtia Scholarship Examination 2024’ yn pynlong ka WJSU

Jowai, Nailur 15

Ka War Jaiñtia Student’s Union (WJSU) ka la pynbna ïa ka tarik ban ïakhun ïa ka ‘1st War Jaiñtia Scholarship Examination 2024’ na ka bynta ki khynnah kiba pule ha ka kyrdan Lower Primary School bad Upper Primary School jong ka thaiñ War Jaiñtia.

Ka tarik ban ïakhun ïa kane ka eksamin kan long ha ka 14 Nohprah 2024 ha ki 14 tylli ki jaka thoh eksamin bad ha kajuh ka por ka la pynbna ruh ba ïa ka khusnam Scholarship yn sam ha ka 21 tarik Nohprah 2024 ha Amlarem.

Ïa kane ka rai pynbna la shim ha ka jingïalang kaba la khot pynlong da ka War Jaiñtia Student’s Union (WJSU) kaba la shim bynta da ki Principal, Headmaster, Head Teacher jong ki skul bapher ka thaiñ War Jaiñtia ha Riwar Jaiñtia Church of God School, Ladjaplem ha ka 14 tarik Nailur.

U Bah Alban K Gashnga, nongaibuit ka seng ha ka jingïalang u la ïathuh ïa ka jingthmu jong ka WJSU ban pynlong ïa ka Scholarship Examination ka long ban wad ïa ki khynnah naduh dangrit kiba don ka sap ka phong ha ka liang ka pule puthi ban ai ka jingïarap pisa ha ka dur ka scholarship.

Nalorkata, ban pynmlien ïa ki khynnah naduh dangrit ba kin mlien ïa kiba kum kine ki jait competitive exam khnang ba ynda ki lah heh kyrdan kin mlien bad kin jop ïa ki jingpule ha ka jingim ka jong ki.

U la ong ba ka WJSU ka khmih lynti ba lyngba ka jingpynlong ïa kum kine ki competitive exam ka thaiñ War Jaiñtia kan sa lah ban sei ïa shibun ki ophisar kum ki IAS, IPS, MCS bad MPS ha ki sngi ki snem ki ban dang wan namar kumba long mynta kiba bun hi ki khynnah pule jong ka thaiñ wat tang 5 percent kim kot bor haba ïanujor bad ki khynnah pule ha ki jaka sor.

Katba u SP ba la shongthait Bah K Rymbui uba dei ruh u Advisor jong ka seng bad u President ka seng Jambok Lanong, ki la kyntu ïa ki nonghikai ban rah ïa kane ka khubor bad ban pynsngewthuh ïa ki kmie ki kpa jong ki khynnah ban pynshlur ïa ki khun ban ïashim bynta ha kane ka competitive exam bad ban kyrshan ïa ka seng khnang ba ka jingpynlong ïa kane ka scholarship examination kan long kaba jop.

Ha kane ka jingïalang na ka liang ki nonghikai ki la pynpaw ba ki long kiba la kloi ban kyrshan ïa ka seng na ka bynta ban pynurlong ïa kane ka jingthmu ba bha jong ka seng na ka bynta ka lawei ba phyrnai jong ki khynnah.

Kiwei pat kiba la ai jingkren ki long u Education Secretary A Sumer, u General Secretary Everest Langstang nalor kiwei.