Mawkyrwat, Nailur 15
U Bah Jeslanroy Nongsiej uba long uwei napdeng ki nongïalam jong ka UDP Mawkyrwat Circle, u la shah jied ban long kum u kyrtong MDC ka UDP na Mawkyrwat Constituency hadien ba u la jop ïa ka ilekshon jied kyrtong na ka bynta ban ïakhun ïa ka ilekshon MDC na Mawkyrwat Constituency kaba la pynlong da ka Election Committee jong ka United Democratic Party (UDP) Mawkyrwat Circle ha ka 14 tarik u Nailur, 2024 hapoh shlem treikam jong ka seng ha Mawkyrwat ha ka Sngi Saitjaiñ.
Kane ka ilekshon jied kyrtong kaba la pynïaid da ka Election Committee UDP Mawkyrwat Circle hapoh ka jingïalam jong u Chairman, u Bah FD Ramsiej, ka la long kaba ïaid beit ïaid ryntih ha ryngkat ka jingkhuid jingsuba ha kaba kam shym la don satia kano-kano ka jingthut ne jingkhohñioh na kano-kano ka liang, bad baroh ki la mynjur bad ïa hun lang ïa ka rukom pyniaid.
Katkum ka jingpyntip jong u Chairman ka Election Committee jong ka UDP Mawkyrwat Circle, u Bah FD Ramsiej, ki don haduh 4 ngut ki ‘riew rangbah kiba long ruh ki nongïalam jong ka UDP Mawkyrwat Circle kiba la pan tiket na ka UDP ban ïakhun ïa ka ilekshon MDC na Mawkyrwat Constituency, kata, u Bah Adilbert Iawphniaw, u Bah Synshar Lyngdoh, Jeslanroy Nongsiej, bad u Bah Poland Sohphoh.
Ha kane ka ilekshon kaba la ailad tang ïa ki President bad Secretary jong ki Polling Unit, ki dkhot ka Executive Committee jong ki UDP Youth Wing, ki dkhot ka Executive Committee jong ki UDP Women Wing, bad ki dkhot ka Executive Committee jong ka UDP Mawkyrwat Circle, u Bah Jeslanroy Nongsiej u la wan ba nyngkong, u Bah Adelbert Iawphniaw u la wan ba-ar, u Bah Poland Sohphoh u la wan ba lai bad u Bah Synshar Lyngkhoi u la wan ba saw.
Na ka liang u Chairman ka Election Committee, u Bah FD Ramsiej, u la ïathuh hadien ba ka Election Committee ka la pyndep ïa ka kamram, kan sa phah ïa ka kaiphod sha ki bor ba halor jong ka seng, bad u ngeit skhem ruh ba ka Election Committee jong ka UDP Sengkmie kan burom ïa kane ka rai jong ka ilekshon, ha kaba u Bah Jeslanroy Nongsiej un long u kyrtong ka UDP ha kane ka ilekshon MDC na Mawkyrwat Constituency.
