Rabat, Nailur:
Ha ka sien ‘nyngkong, la ong ba ki bor pyniaid ka Morocco ki la pynbna ia ka jingdon kiba ioh ia ka jingpang Monkeypox lane ‘Mpox’ hapoh ka nongbah Marrakesh. Kane ka dei ruh ka sien ba nyngkong ha North Africa ban iohsngew ia ka jingdon kiba ioh ia kane ka jingpang naduh ba ka WHO ka la pynbna ia katei ka jingpang kynsha kum ka jingpang kaba ap jingma ia ka pyrthei baroh kawei.
Kumta la ong ba ka tnat CDC jong ka Africa ka la pyntikna ia katei ka jingdon kiba ioh ia katei ka jingpang Monkeypox ha North Africa ha kane ka sien, katkum ba la pynbna da ka Ministry of Health jong ka Morocco ha ka 12 tarik u Nailur lyngba ka jingpynbna ba la pyllait ha ka website jong ka Centres for Disease Control & Prevention ha ka Sngi Palei.
Da ka jingdon jong ka Morocco ha kane ka kynti, la ong ba ki la don 15 tylli ki ri Africa kiba la sakhi ia katei ka jingpang bad kiba katei ka jingpang ka la lah ban pur tang hapoh jong une u snem.
Ia ka Mpox, la ju tip baroh shi katta kum ka Monkeypox, bad ia kane ka jingpang la ju ioh bad ngat tang ha kito ki briew kiba la iatyngkhuh kam ne don lang bad kito ki mrad kiba ioh ia katei ka jingpang. Hynrei ka ju pur ruh sa na uwei u briew sha uwei pat lyngba ka kam shongkha.
Kane ka jait jingpang hateng-hateng ka long ka bym da buh jingma hynrei don pat ki khep kiba ka lah wat ban pyniap syndon ia u briew ynda ka la ioh ban ktah jur ia ka met u briew lyngba ki doh ksah bad khamtam ha ka sniehdoh.
Haba iadei bad kane, la ong ba ki bor pynïaid ka Morocco ki la pyntip ba uwei u nongpang uba 32 snem na Marrakesh, u la long ‘Positive’ ia katei ka jingpang bad kumta u dang shah peit bniah bad shah sumar ha kawei na ki hospital ba la pyllait jaka kyrpang na ka bynta jong u khnang ba katei ka jingpang kan ym pur ne ktah ia kiwei pat kiba don lang.
