Tura, Nailur 15
U nongïalam ka BJP uba dei ruh u MDC ka Tura, u Bernard N. Marak ha ka Sngi U Blei u la kyntu ïa ka NPP bad ïa u Myntri Rangbah ka Jylla, u Conrad K. Sangma ban aiti noh ïa ka GHADC sha ka BJP lada kam lah ban bat ïa ka kular ba la khlei sha ki nongtrei jong ka.
“Ka NPP ka dei ban ai lad noh ïa ka BJP ban ïalam ïa ka Garo Hills Autonomous District Council (GHADC) lada kam lah ban bat ïa la ka jong ka kular sha ki nongtrei jong ka. Ka NPP ka la pynmih ïa ka ‘Notification’ ha u snem 2018 ban pyllait ïa ka tulop katkum ka ‘5th Pay Commission’ bad naduh katei ka por, la mynjur ïa ka mang tyngka ha ka ‘5th Pay Commission’ hynrei ki nongtrei ki la shah thok naduh u snem 2018 ha ka Executive Committee ba ha shuwa jong ka NPP da kaba ai tulop hapoh ka ‘4th Pay Commission’,” ong u Bernard ha ka kyrwoh khubor.
U Bernard u la pynskhem ba dei tang ka BJP kaba lah ban pynbeit ïa ki jingeh ha ka liang ka pisa-tyngka ha GHADC, wat haba u la kam ba ki la don bun tylli ki jingpyrshang da ka NPP ban pynpaw pyrthei ïa ka GHADC sha ka Sorkar Pdeng kum ka shlem treikam ka bym lah ban leh eiei.
“Nga don ki jingpynshisha haba ïadei bad ki shithi ba la thoh da ki Myntri ka NPP. Ka NPP ka dei ban aiti noh ïa ka GHADC sha ka BJP ban ïalam bad ngi lah ban pyntikna ïa ka jingskhem, ka jingkhlaiñ bad ka jingpynthymmai ïa ka Autonomous Council hapoh hynriew bnai,” kob u Bernard.
