Shillong, Nailur 15
Ka surok four-lane na Umshyrpi shaduh Hynñiew Mer, Upper Shillong ka la poi mynta shaduh Lad Lummaw-bah kaba la jan kynduh bad ka jingkieng Umshyrpi.
Kane ka surok saw lynti ka ban rung ar tylli ki kali ban ïaid hajuh ka por ban kiew bad hiar ar tylli ha kajuh ka por ka dang ïaid shaid shaid ha Bañiun namar ka kompani ba pyntrei ka dang pynïeng ïa ki nar ba heh kaba lah ban shna kum ka surok na suiñ (fly over) khnang ban lah ban ïaid kiba wan na ki thaiñ West Khasi Hills bad kiba wan na Dawki bad Sohra.
Nangta ha Hynñiew Mer la ïohi ba ka kompani ka la lah ban shna shiliang ka surok hynrei ka khlem pat siang rong namar ka dang shna sa shiliang ka surok.
Katba ha mar pyrshah ka kynroh jong ki shipai Air Force, la don ki bynta ba ka kompani ka la dep ban kynroh hynrei ka hap ban pyllait ban pynkhyllem ïa ki diengkseh bad sha shiliang ka la lah ban pynmadan ïa ka surok kaba don bad ka jaka ïeng ki helicopter.
Ha ki bynta na Hynñiew Mer shaduh Saw Mer shiteng kiba bun la dep pynmadan shiliang ïa ka surok hynrei ka hap ban shna janai khnang ban ym don ka jingthut haba ïaid ki kali.
Ïa kane ka surok la ïaid-lait na madan phutbol Sawmer sha khlaw jong ka tnad Forest ban poi sha Lai mer kaba don harum khyndiat jong ki dukan die soh bad poi shakhmat ka skul Gorkha bad ïaid hapdeng ka surok rim kaba don ki shipai 101 Area.
Haduh mynta ka kompani ka la sdang ban kynroh ha pyrshah ka skul shipai kaba don hajan ka Lummawbah bad ka la sdang ruh ban kynroh na trai khnang ban skhem haba shna ïa ka surok kaba don marjan bad ka jingkieng Umshyrpi.
