Shillong, Nailur 15
U President ka Jaiñtia Hills Autonomous District Council (JHADC) Staff Association, Bah Johnson Pohrmen, u la ong ba ki MDC ka JHADC kim dei ban shim tulop haba la shu pynjlan ïa ki da ka sorkar jylla namar ki nongtrei baroh kim shym la ïoh tulop.
U la ong ba ki MDC ka JHADC ki la dei ban shim tang ka bai burom haba ki leit ki wan hynrei ym dei ban sei ïa ka tulop namar ka por treikam jong ki ka la kut namar la shu pynjlan ïa ki sa shisnem da ka sorkar jylla.
“Haba ngi ki nongtrei ngi duh tulop, kumno ki MDC kin shim tulop haba ka samoi treikam ka la kut, ngim sngewïahap,” u la ong.
U la pyntip ba ka seng kan sa leit ban pynsngew sha ka ïingbishar Meghalaya High Court ba kan ai noh ïa ka rai haba ïadei bad ka mukotduma kaba ka seng ka la dep ai ha u bnai Nohprah 2023 khnang ba lada ka ïingbishar ka lah ne kam lah ban ai ïa kano-kano ka rai ba kin sngewthuh pat halor ka jingbym ïoh tulop ki nongtrei ka JHADC.
U la ïathuh ba ha kine ki sngi ka seng kan sa leit biang sha ïingbishar ban ai noh ïa ka rai namar lada kam lah ban shim rai, ka seng kaba khatduh kan sdang beit da ka jingïakhih ban dawa ban ïoh noh ïa ka tulop kaba la shah set.
Shuh shuh u la pyntip ba ka tulop haduh u bnai Nohprah 2023 la dep ïoh lut naduh ba ka sorkar ka la pyllait haduh 58 klur tyngka. Hynrei mynta u snem 2024 kim pat ïoh wat tang shi bnai naduh u Kyllalyngkot haduh u Nailar, kaba mut phra bnai ki dang sahkut ka tulop.
Haba kylli kumno ki sngew haba ka Voice of the People Party (VPP) ki leit ban ïakhih haba duh tulop ki nongtrei JHADC, u la ong ba kum ka seng ki nongtrei kim don jingtip eiei hynrei ki shu ïohi ha ki lad pathai khubor hynrei ka seng kam don bynta eiei namar ma ki, ki ïaid la ka jong.
“Kum ki nongtrei ngi hap ban leit pynsngew beit sha ka sorkar ba kan siew tulop ïa ngi bad lada ka sorkar kam ai, kaba khatduh ka long satang ban ïakhih,” u la ong.
U la pynkynmaw haba ka sorkar ka la pyllait ïa ka pisa 50 klur tyngka, ka JHADC ka la siew ïa ka tulop hynrei hadien ba ki la leit ïakynduh ïa u MLA ka Jowai Bah Wailad Shylla u la pyntip ba ka sorkar kan sa pyllait ïa ka pisa kaba 39 klur tyngka hynrei la ïoh tang 8 klur tyngka kaba la siew dep ïa ka tulop jong u bnai Nohprah 2023 katba ka 31 klur tyngka khlem pat tip haei ka la don.
Ha kajuh ka por u la pyntip ba lada ka sorkar kam pyllait noh ïa ka tulop ba dangsah jong ki nongtrei ka JHADC ki hap ban ïakhih noh ha kine ki bnai shwa ban wan ka ilekshon MDC.
