New Delhi, Nailur:
Shi sngi hadien ba u la shah pyllait na patok, u Myntri Rangbah jong ka Delhi u Arvind Kejriwal u la leit jngoh ïa ka Hanuman Mandir ha Connaught Place ha ka por shiteng sngi jong ka sngi Saitjaiñ na ka bynta ban leit duwai, la ïathuh ka tyllong khubor ba la wan na ka seng Aam Aadmi Party (AAP).
U Kejriwal na ka por sha ka por u ju leit jngoh ïa kane ka jaka mane blei, bad ha u bnai Jymmang haba u la shah pyllait jamin shipor na ka bynta ki 20 sngi na ka bynta ban leit ïalap ilekshon na ka bynta ka seng ha ka jingdon jong ka ilekshon Lok Sabha, u Kejriwal u la leit jngoh ïa ka jaka mane blei ha ryngkat ka kurim jong u bad kiba bun kiwei pat ki nongïalam jong ka seng.
Ka jingmynjur ban pyllait jamin ïa u Kejriwal ka la long ha ka por ba la pyntreikam da kawei pat ka kynhun nongbishar jong ka Supreme Court ha u Naitung, um shym la lah ban leit sha ka jaka treikam, soi ïa ki kot donkam ne ban pyllait paidbah ïa ki jingthoh shaphang ki kam jong u ha kaba ïadei bad ka jingjia ha ka tnat Excise.
Shuh shuh, la ong ba ka ïingbishar bahakhliehduh ha ka sngi Thohdieng ka la hukum ba u Kejriwal u la dei ban don ha baroh ki jingbishar jong ka katba um pat ïoh jingbit ne shah pyllait, bad u la dei ban ïatreilang bad ka ïingbishar khnang ban lah ban pyndep ïa ka jingtreikam.
