New Delhi, Nailur:
Katkum ki khubor, la ong ba ki pulit ka Phlippines ki la kem noh ia une u Pastor uba la ithuh kum u Apollo Quiboloy, uba la kam ialade ba u long “u trai jong ka pyrthei” bad “u khun jong u Blei ba la jied da u Blei” hadien ba ki bor pynïaid ki la phah thwet ia u namar ka jingsuba ba u don kti ha ki kam khaïi be-aiñ ia ki khynnah.
Kumta, la ong ba ki bor pynïaid ka Philippines ki la phah haduh 2,000 tam ki pulit mynta la artaiew ba la leit thwet bad talasi ia ka jaka kaba ïar haduh kumba 74 akar ha ka nongbah Davao kaba don sha ka phang Shathie kaba dei jong ka Balang kaba utei u pastor u ialam- ka Kingdom of Jesus Christ (KOJC) bad ki la leit ban khynra ia katei ka thaiñ hadien ba la suba bad ioh jingtip ba u leit rieh ha katei ka jaka.
Ha ka jingleit khynra jong ki pulit, la ong ba ki nongbud jong u Quiboloy ki la khang khyrdep ïa ka khyrdop jong katei ka phyllaw ban khanglad ïa ki pulit kiba thmu ban leit rung bad khynrah ha katei ka jaka bad ban pyntreikam ruh ïa ka hukum jong ka ïingbishar ban kem noh ia utei u nongialam niam. Kumta la ong ba ki pulit ki la hap ban pyndonkam ruh da ki helicopter ban iaid kylleng sawdong jong katei ka iingmane kaba heh bah kumjuh ruh ban syntiat ia kawei ka kolej, bad kawei ka madan ialehkai kaba don 75,000 tylli ki jaka shong tang ba kin lap ia utei u nong-ialam niam ba shukor.
Kumta la ong ba u Apollo Quiboloy, uba long ruh u paralok jong u President barim ka Philippines- U Rodrigo Duterte, u shah thwet bad shah bud-dien halor ki jingkynnoh ba u don kti ha ki kam leh be-ijot ia ki khynnah bad shim kabu ha ka kam shongkha bad la pharep ruh ba u don kti ha ki kam khaïi briew. Nalor kata, la ong ba utei u briew u la dep don dak bad u la dop teng ha ka thup jong ki runar kiba ka ka FBI ka thwet bad bud-dien halor ki kam khaïi briew be-aiñ bad ka jingpyniaid ia ki kam die met be-aiñ.
Nangta, la iathuh ba u Quiboloy u la shah pynngat ha ka tnat aiñ jong ka US ha u snem 2021 halor ka jingkhaïi bad jingpynïaid ia ki kam die met ia ki khynnah kynthei bad ki kynthei kiba hapdeng ka rta 12 haduh 25 snem ban trei kum ki nongiarap shimet jong u, lane ki “pastoral”, kiba u la thung khnang kum ki nongbud ba kyrpang jong u bad kiba dei ban iathiah lang bad u.
Hynrei la ong ba utei u nongialam niam, uba pynpaw ruh ia ki kam kum u nongialap niam, haba la kem bad tohkit da ki pulit, u la kyntait ia baroh kine ki jingkynnoh bad ong ba um shym don jingthmu ne jingmut sniew eiei ia kitei ki nongbud bad ki dkhot jong katei ka Balang kaba u la seng hynrei ba baroh ki long tang ki jingkynnoh bakla.
