Shillong, Nailur 15
U Arvind Kejriwal, ha ka Sngi U Blei u la pynbna ba un sa hiar noh na ka shuki Myntri Rangbah jong ka Delhi ha kine ki ar sngi ban wan bad un sa wan phai tad ynda la jop ïa ka jingshaniah jong ki paidbah. Halor kane, ka Aam Aadmi Party National Convenor ka la dawa ruh ba dei ban pynlong noh kloi ïa ka ilekshon ha Delhi.
“(Ka Supreme) Court ka la leh ïa kaba ka lah ban leh da kaba rai ha ka liang jong nga bad ai jamin ïa nga. Mynta ka sngi, nga wan sha ka ïingbishar jong ki paidbah ban kylli ïa phi hato phi kheiñ ba u Kejriwal u long uba donkti ne uba hok. Hadien ar sngi, ngan sa hiar noh na ka shuki Myntri Rangbah, bad ngan nym shong ha katei ka shuki tad haduh ba ki paidbah kin ai ïa ka rai jong ki,” u la ong haba kren sha ki nongtrei jong ka AAP ha Delhi.
U Kejriwal, u la dawa ruh ban pynlong ïa ka ilekshon kaba kham kloi ha Delhi. “Ka ilekshon ha Delhi ka dei ban long ha u bnai Rymphang hynrei nga dawa ba ka ilekshon ha ka nongbah jong ka ri kan long ha u bnai Nohprah bad ka Maharashtra,” u la ong.
Lah ban pynkynmaw ba u Arvind Kejriwal u la lait na patok ha ka Sngi Thohdieng hadien ba ka Ïingbishar kaba hakhliehduh jong ka ri (Supreme Court) ka la ai jamin ïa u ha kaba ïadei bad ka jingujor ka Central Bureau of Investigation (CBI) halor ka Delhi Excise Policy bad kane ka jingïoh jamin jong u ka dei ha ryngkat ki kyndon.
Hynrei ka Ïingbishar lyngba ki nongbishar kiba kynthup ïa u Justice Surya Kant bad Ujjal Bhuyan ka la buh ki kyndon ha kaba u Kejriwal u hap ban bud kumba u la hap ban bud ïa ki kyndon kiba la buh da ka Ïingbishar ha ka por ba u ïoh jamin ha ka 12 tarik Naitung, 2024 ha kaba ïadei bad ka jingujor ka Enforcement Directorate.
Ki kyndon kiba la buh da ka Ïingbishar ha kane ka jingïoh jamin ki long ba ïa u Kejriwal yn ym shah ba un leit jngoh ïa ka shlem treikam u Myntri Rangbah bad ïa ka Delhi Secretariat. La khang ruh ïa u Kejriwal ban soi ïa ki kot ki sla lait noh tang lada donkam ban ïoh ïa ka jingmynjur jong u Lieutenant Governor jong ka Delhi.
Halor u Myntri Rangbah ba thymmai jong ka Delhi, u Kejriwal u la ong, “Ngan pynlong ïa ka jingïalang jong ki MLA ka AAP ha kine ki ar sngi ban wan bad uwei u Nongïalam ka AAP un shimti ïa ka kam kum u Myntri Rangbah.”
“Nga bad u Manish Sisodia ngin leit sha ka ‘Janta ki adalat’ ne sha ka ïingbishar ki paidbah bad ka lawei jong ngi ka shong ha ki kti jong phi. Nga kyntu ïa phi baroh ban jied ïa nga lada nga long uba hok, lada ym dei te sngewbha wat jied. Lada ka Centre ka buh jingkylli balei ka sorkar kam lah ban treikam na patok, nga la pynshisha ba ka lah mynta bad nga kyrpad ïa baroh ki Myntri Rangbah bym dei jong ka BJP ba kim dei ban hiar shuki lada shu shah set patok thok,” ong u Kejriwal.
Halor kane ka jingjia kaba pynkyndit, u Harish Khurana na ka BJP u la buh jingkylli ba balei utei u Nongïalam ka AAP u thaw ïa ka drama. “Balei hadien 48 kynta? U dei ban hiar shuki noh mynta. Ha ki por ba la dep ruh, u la leh kumne. Ki briew na Delhi ki kylli, um lah ban leit sha Secretariat, um lah ban soi ïa ki kot ki sla? Kaei ka jingmyntoi te?” Haba la kylli hato ka BJP ka la pynkhreh ne em na ka bynta ka jingthep vote kaba kloi, u Khurana u la jubab, “Ngi la pynkhreh, la ka long mynta ka sngi ne lashai. Ngin wanphai biang ha ka bor synshar ha Delhi hadien 25 snem.”
Haba kren sha ki lad pathai khubor, u heh ka BJP na Delhi u Virendraa Sachdeva u la ong ba u Kejriwal u ong ba ki paidbah ki dei ban rai lada u dei ban long Myntri Rangbah ka jylla. “Ki paidbah ki la dep ban ai ïa ka rai jong ki, lai bnai mynshwa (ha ka por ka ilekshon Lok Sabha). Phi la ïaid ha ki surok jong ka Delhi bad pan vote. Ki paidbah ki la ai ïa ka jubab jong ki bad ki la buh ïa phi ha ka jaka jong phi,” u la ong.
Katba ka Congress ha Delhi ka la pdiang sngewbha ïa katei ka rai ban iehnoh kam jong u Kejriwal, da kaba ong ba ka long kaba biang wat la ka wan slem ruh. “Kan jin da la bha lada u la iehnoh ïa ka kam ha ka por ba ka Delhi ka ïakynduh ïa ka jingshlei um bad ka jingkyrduh umbam umdih. Nga kyrmen ba shen ka Delhi kan ïoh ïa u Myntri Rangbah ba thymmai uba lah ban leit sha ophis treikam jong u bad ban soi ïa ki kot ki sla,” la ong u heh ka Delhi Congress u Devendra Yadav.
