Khliehriat, Nailur 15
Ka Rymbai Madanpynriang SC, Ladrymbai Dongwah SC, Musniang SC, Umlyngsha Youth SSC, Lumputhoi SC bad Lakadong Umlatdoh ki la jam sha ka quarter final ha ka Second Division Foot-ball Tournament ba la pynïaid da ka East Jaiñtia Hills Football Association (EJHDFA).
Ha ka jingïalehkai kaba la long ha ka sngi Saitjaiñ ha Deinshynrum, Khliehriat, ka Musniang SC ka la pynliem da 3-0 kol ïa ka Ïapmala UTD SC. Ïa kine la thep Mardi Rymbai ha ka minit kaba 14, kumjuh u One enjoy Dkhar (44) bad u Yookilang Siangshai (69).
Ha ka jingïalehkai kaba bud, ka Rymbai Madanpynriang SC ka la pynliem ïa ka Ladrymbai Dongwah SC da 1-0 kol bad ïa kane la thep da u Encourage Dkhar ha ka minit kaba 74.
Ha ka jingïalehkai kaba khatduh jong kane ka sngi hapdeng ka Lumputhoi SC pyrshah ïa ka Umlyngsha Youth SSC ki la ïakhaid mar 2-2 kol. Na ka Umlyngsha Youth la thep da u Eleven Biam ar kol ha ka minit kaba 6 & 43, katba na ka bynta ka Lumputhoi la thep da u Midrik Lyngdoh ha ka minit kaba 17 bad Forjoin Lyngdoh ha ka minit kaba 72.
