Kyiv, Nailur:
Katkum ki khubor, la ong ba ka Russia ka la pynmih ia ki jait drone thymmai kaba la buh kyrteng da ka ‘Garpiya-A1’ bad kaba la pyndonkam da ki tiar ba la ioh na ka China ia kaba ka Russia ka la pyndonkam hapdeng ka jingiakhun thma pyrshah ia ka Ukraine.
Haba iadei bad kane, ka US ka la pynpaw ka jingsngewkhia halor kane ka jingleh jong ka Russia, da ka jingioh ruh ia ka jingkyrshan sop-sop na ka Iran bad kumjuh ruh ka jingkyrshan ba paw pyrthei jong ka China.
Ia kane ka khubor ym pat shym la pynbna ne pynpaw baroh shi katta, hynrei na ka liang ki kompeni kiba dei ha ki liang shna bad pynmih ia ki drone, kynthup ia ka IEMZ Kupol bad ka Almza-Antey ruh kim shym la jubab ne kren eiei halor kane ka khubor.
Hynrei ka kynhun syntiat jong ka US ka la lap ba ka Russia ka la pyndonkam ia kitei ki drone Garpiya baroh shi katta bad ki dei kine hi ki jait drone kiba ka Russia ka la pyndonkam ban leit pynjulor ia ki shlem treikam bapher jong ka Ukraine baroh shi katta.
Hynrei, katei ka tnat syntiat ka la pyni ia ki dur kiba la ioh shon da ki shipai Ukraine ha ki jaka ba la lap ia kitei ki drone kiba la bthei bad julor hapoh Ukraine.
