Ko paralok parajor, ngi ki briew hangne ha sla pyrthei. ka jingkylli ka long aïu ngin leh keiñ na ka bynta ka jingim, namar tang shisien ngin ïap ngim lah shuh ban wanphai. Wat la ka jinghikai niam ka ong, ba ngin ïap, hynrei ngin sa mih pat ha ka akher ka sngi. Kano ka rukom hikai jong ka niam ka long tang ban ai jingkyrshan ïa ngi, hynrei kam long kaba shisha. Ka jinghikai niam ka shu pynkmen tohhoh ïa ngi ba ngin hun ha ka mynsiem. Hynrei ka long thik kum ka jinglong samla shisien ba la duh bad jam ka jinglong tymmen ym lah shuh ban wanphai pat kum u samla da lei lei ruh. Namarkata to ngin long kiba ïaid ha ka hok bad ka jingshisha. Wat la ngin duh noh ïa ka jingim, hynrei ngin sngewsuk ha ka mynsiem, wat lada ngi la iap kan im ka kyrteng bad sah ka nam. Namar ka jingim jongngi ki briew ka shu kut noh tang shiteng por long kum u syntiew uba phuh mynta mynstep tang katto katne u la tlor bad jlop noh. Ka jingim jongngi ki briew ki bym don dor lada ngi pyrkhat bha ïa ka jingim ha kane ka sla pyrthei. Tang khyndiat snem ngi kmen ngi sngewbha bad tang ha ki khyndiat minit ngi la leit thiah noh shapoh dewmet khlem wanphai shuh.
C. B. Iawphniaw
