Khliehriat, Nailur 16
U District Magistrate (DM) jong ka East Jaiñtia Hills District u la bthah ïa ka tnat PHE ba kan maramot noh kloi ïa ki pipe um kiba sniew ha shilynter jong ka surok bah NH-6.
Halor ka jinglong-jingman jong ka surok bah National Highway NH-6 ha shilynter jong ka East Jaiñtia Hills District kaba la pynlong ïa ki kali ban sniew bad wanrah ka jingdheng kali kaba jur hapoh ka District, u District Magistrate jong ka East Jaiñtia Hills District u la pynbna ïa ka Section 163 jong ka BNSS kaba khang ban kit palat pud jong ki kali.
Katkum ka hukum kaba la pynmih ha ka Sngi Nyngkong, u District Magistrate u la bthah ba ïa ka jingkit jingbah dei ban ïaid beit ryntih katkum ka jinglah ban kit. Ka hukum ka la khang ba ki maw bad ki mawsiang kiba kit da kano-kano ka kali kim dei ban palat ïa ka jingjrong jong ka met jong ka kali bad la bthah ruh ïa ki nongkit ba kin pynthikna ba ym don maw ne mawsiang kiba hap na ka kali ha ka por ba kit. Halor ka khubor ba la pyntuid ïa ki um da ki jaka sait kali sha ka surok bah, u Majistor jong ka District u la bthah ïa baroh ki jaka sait kali kiba don harud ka surok NH-6 ban pynthikna ba ka um kan ym tuid sha ka surok.
