Nongstoiñ, Nailur 16
Ka Khasi Students’ Union (KSU) West Khasi Hills ha ka Sngi Nyngkong ka la leit ban ïakynduh ïa u Deputy Commissioner (DC) jong ka West Khasi Hills District bad ban aiti ruh da ka jingthoh ban pynpaw ka jingpyrshah halor ka jingthmu jong ka sorkar Assam ban shna surok ha ka thaiñ Langpih.
Ha ka kyrwoh khubor ba la phah, ka Khasi Students’ Union (KSU) West Khasi Hills District ka la pynpaw ïa ka jingsngewkhia bad kam ba ka Sorkar Assam ka la wanrah jubor ïa ki skhim bad ki projek bapher bapher wat hapdeng ka jingïateh (status quo) ba ha shwa ban pyntreikam ïa kino-kino ki skhim ne projek ha ki jaka ba khappud dei ban ïoh ïa ka jingmynjur na baroh ar tylli ki Jylla.
Shuh shuh, ha katei ka kyrwoh khubor ba la aiti da ka KSU, ka la ong ruh ba ka Assam ha ka 11 tarik Nailur, 2024 ka la wan jurip (survey) ïa ki jaka ban tih surok ban leit sha ka shnong Sohmarang, Jyrngam Syiemship ha West Khasi Hills bad ïa kane ka surok ki thmu ban pom lyngba ka shnong Nongdronpara, Nongma, Nongmawlein, Nongsohram kiba dei ki shnong Khasi.
U samla Johnfisher Nongsiang, uba dei u President ka KSU West Khasi Hills District Unit u la ong ba ka KSU ka pyrshah jur ïa kane ka jingleh donbor khlem ka jingmynjur jong ki paidbah.
“Ka KSU hadien ba ka la ïoh jingtip, ka sngew pyrshah jur ïa kane ka jingthmu ka sorkar Assam namar kumba ngi tip ba ka sorkar Meghalaya ka pyntrei ïa ka skhim JJM hapoh ka thaiñ Langpih, ha kaba na ka liang ka sorkar Assam ka la pynsangeh noh ïa kine ki projek jong ka sorkar Jylla bad kine kiei-kiei ki dei ki jingpynkheiñ, namar katkum jingïateh soskular baroh ar tylli ki Jylla kim dei ban pynwit ïa kino-kino ki projek kiba wan na ka Sorkar Kmie hynrei kane ka jingleh jong ka Assam ka la pynkheiñ ïa ka soskular,” ong u samla Johnfisher.
U samla Johnfisher u la ong ruh ba na ka liang ka KSU, ka ïeng pyrshah bad kan ym shah da lei-lei ïa kane ka projek jong ka Assam ban shna ïa ki surok. U la kam ruh ba lada ka Assam ka thmu ban shna bad ka leh donbor, ka KSU ruh kan pyni bor bad kan hap ban mih shakhmat ban pynpra ïa kane ka surok ne ïa kino-kino ki tiar ki tar ka Assam kiba wanrah bad u pynpaw ruh ïa ka jingbyrngem ba ka KSU kan thang ïa ki kor (machine) ïa kaba ka Assam ka thmu wanrah ban shna bad kan ïeng pyrshah bad kan nym ailad da lei-lei ïa kane ka projek.
U la ong ruh ba ka KSU ka kyntu ïa u Deputy Commissioner ba un shimkhia ban tuklar mardor halor kane ka kam khnang ban lait na kino-kino ki jyrwit-jyrwat khamtam ha kaba ki ar tylli ki jylla ki dang don hapdeng ka lynti ban pynbeit ïa u pud.
Shuh shuh u la ïathuh ruh ba halor katei ka bynta, shen na ka liang ki bor District bad ka tnat pulit ka West Khasi Hills kin sa hiar leit jngoh sha kitei ki jaka.
