Jowai, Nailur 16
Ka long kaei-kaei kaba sngewkhia ba ki runar ki la ïohlad ban rung shapoh ka ophis treikam jong u Deputy Commissioner (DC) ka West Jaiñtia Hills District bad ban kyndang jubor ïa ki waïar jong ka kor internet bad CCTV camera bad rong tuh ruh ïa ki da kaba suk.
Katkum ka tyllong khubor kaba ïohlum, la ïathuh ba kane ka jingjia ka la jia ha ka step phyrngab jong ka 16 tarik mynta u bnai bad u nongap (chowkidar) u la ïohi bad lap ïa kane ka jingjia ha ka por kumba 7.00 baje mynstep.
Ka ophis jong u DC kaba don ha nongbah Jowai ka long ka ophis treikam kaba donkam duh ha ka nongbah, namar ïa ki kot ki sla kiba donkam kiba ïadei bad ka synshar-khadar la buh ïa ki, hynrei ki ‘riew runar da kaba suk ki la ïoh rung ban pynjulor bad kyndang jubor bad ki la ïoh lad ruh ban phet da kaba suk. Kitei ki waïar ki dei kiba la shongdor kumba shi lak duna.
Ki pulit ka District mar ïa ïoh jingtip halor kane ka jingjia, mar-mar ki la leit sha ka ophis u DC bad hadien ka jingtohkit ki la pynrung mukotduma hapoh thanat Jowai bad la pynlong shuh shuh ka jingtohkit ban lap dien ïa ki runar kiba donkti.
