Shillong, Nailur 16
Ha kawei ka jingjia kaba la lait thaw na ka jingïap ha kaba kawei ka kali Alto ka la noh na ka surok shnong shapoh ka ïing briew kaba la jia ha ka janmiet jong ka Lah Sngi U Blei ka 16 tarik u Nailur, 2024 ha ka por kumba 6 baje tam eiei ha Lumkshaid, Lower Mawprem.
Ha kane ka jingjia, katei ka kali Alto ka la pra bad kylla khongpong bad ka la rat lang ruh ïa kawei ka thuk-thuk kaba la pynïeng harud ka surok kaba la pynlong ïa katei ka thuk-thuk ruh ba kan julor.
Katei ka ïing ka dei kaba la long trai da ka Kong Aidistina Lyngdoh bad kaba la shong wai pat da u Bah Cyrus Susngi. Ha katei ka jingjia ym shym la don satia mano-mano ba mynsaw hapoh katei ka ïing hynrei ki la don pat katto-katne ki bynta jong ka ïing kiba la julor ha kaba ki trai jong katei ka ïing, ki la hap ban sei noh ïa baroh ki tiar ki tar jong ka ïing shabar.
La ïathuh ba hapoh katei ka kali ki don ar ngut ki briew kiba la buaid jawsheh. Ka daw kaba la pynlong ïa katei ka jingjia ka dei namar u nongñiah jong ka kali u la buaid jawsheh ha ryngkat ka jingbym tip briew shuh hynrei u la shu mynsaw malu-mala.
La ïathuh ruh ba utei u briew uba ñiah ïa ka Alto u dei u ba shong ba sah hapoh katei ka dong hi.
Na ka liang ki pulit haba ïoh jingtip halor katei ka jingjia, ki la leit mar-mar sha katei ka jingjia ban tan ïa katei ka kali bad kumjuh ruh ïa ka thuk-thuk bad ki la rah ruh ïa utei u briew sha thanat.
Na ka liang ki trai jong katei ka ïing ki la ïathuh ba utei u briew u la buaid naduh ka por mynsngi ha kaba u la ïaid sharum-shaneng bad man la ka sngi ha ka phyllaw jong katei ka ïingsah, ki khyllung ki ju ïalehkai bha hynrei ha ka por ba jia katei ka jingjia pat ki khyllung kim don satia.
Shuh shuh kitei ki trai ki la ïathuh ruh ba ha katei ka kamra ba julor, ki ju shong khreh kot man la ka sngi hynrei ha katei ka por pat ki khlem shong bad ki la dawa ruh ba utei u briew un hap ban siew ïa kaba u la pynjulor baroh.
