New Delhi, Nailur:
Ka India ha ka Sngi U Blei ka la phah ïa ki lad jingïarap ba kyrkieh sha Myanmar, Laos bad Vietnam hapoh ka song jingïarap ba la ai kyrteng ka ‘Sadbhav’ ban ai jingïarap kyrkieh na ka bynta kitei ki ri kiba la shah ktah ha ka eriong kaba jur ha ki sngi ba la leit.
Namar la ong ba ki bynta bapher bapher jong ka Myanmar, Laos bad Vietnam ki la mad ïa ka jingshlei um kaba jur hadien ba ka eriong ‘Yagi’, kaba la ong ba ka dei ka ‘eriong kaba khlaiñ tam ha Asia mynta u snem, ka la leit lynshop ïa kine lai tylli ki ri.
Kumta, ha katei ka sngi u Myntri kam bar ri ka India- u S Jaishankar u la ong ba 10 ton ki jingiarap ba kynthup ia u khaw, ki jaiñ- ki nep bad ki dawai-dashin la phah sha Myanmar da ka jhad shipai duriaw jong ka India ka ‘INS Satpura’.
Ka liengsuin shipai jong ka Indian Air Force pat ka la kit ia ki jingïarap kiba 35 ton sha Vietnam bad 10 ton ki tiar iarap sha Laos.
Namarkata, la ong ba kane ka jingkloi jong ka India ban sngewlem bad ban phah ia ki jingïarap sha kitei lai tylli ki ri, ka long ban pyni ia ka jingsngew jan bad jing-iatylli jong ka India bad kiwei pat ki ri ba marjan bad ban ia ai ruh ka kti kamon kti kadiang khamtam ha ka khia- ka shon. Namar la ong ruh ba lada iatrei lang bad iasnoh kti lang, kam don kano- kano ruh ka jingeh ba ym lah ban ialeh pyrshah ne ban tehlakam.
U Jaishankar u la bynrap ruh ba ka IAF_MCC ka kit 35 ton ka jingiarap kaba kynthup ia ki tiar pynkhuid um, ki jingbuh um, ki jainkup, ki tiar shet jingshet, ki sharak sngi na ka bynta ka Vietnam. Kumjuh ruh 10 ton ka jingiarap kaba kynthup ia ki genset, ki tiar pynkhuid um, ki tiar pynkhuid, ki jain pyniap khniang, ki jain bad ki jain thiah na ka bynta ka Laos.
