Washington, Nailur:
Katkum ki khubor, la ong ba u President barim jong ka United States- u Donald Trump ha kane ka sien u la lait thaw biang na ka jingshah siat katba u dang don ha ka madan ïalehkai golf jong u ha Palm Beach hapoh ka nongbah Florida. Hynrei, ki dkhot ka seng Republican ki la iathuh ba kam shym la don kano-kano ka jingma ne jingktah ia utei u nong-ialam ha katei ka jingjia kaba la wan jia ha kane ka por.
Haba iadei bad kane, ka Vice President jong ka US, ka Kamala Harris, kaba long ruh ka kyrtong President jong ka seng Democratic Party, ka la iathuh ba ka la ioh jingtip shaphang katei ka jingjia halor ka jingsiat suloi hajan ka jaka ba don u President barim- u Trump hapoh Florida bad ka la ong ruh ba ka sngewkmen shibun ba utei u nong-ialam um shym la shah ktah eiei bad u la lait thaw na katei ka jingjia kaba la buh jingma ia ka jingim jong u ha katei ka sngi. Hynrei, ka Kamala ka la ong ba ki bor ka aiñ jong ka US ki dei ban pyntikna kum kine ki jingjia ki dei ban sangeh noh shi syndon, namar ym don jaka ia ki kam thombor ha ka saiñ pyrthei hapoh ka ri.
Ka US Secret Service, ka seng kaba don ka jingkitkhlieh ban iada ia ki President kiba dang shakri bad kiba la don lypa, la ong ba ha katei ka sngi ruh ka la synran lang ia u Trump katkum ka protocol kaba la bud da ka kynhun.
Haduh ka step Sngi Nyngkong, ym pat shym la lap ia ka daw ne jingthmu jong katei ka jingjia hynrei la ong ba kane ka la jia tang hadien ar bnai ba la don uwei u runar uba la pyrshang ban shim ia ka jingim jong u Trump ha Butler jong ka nongbah Pennsylvania. Kane ka la pulom noh ha kaba uwei u nongsiat uba la thew bad thmu janai bha da kaba shong najrong jong kawei ka tnum iing mala, u la siat ia u kuli 5.56mm na ka suloi kaba syriem kum ka AR-15, kaba la leit dei ia ka bynta jong ka shkor jong utei u nong-ialam ha katei ka por. Na ka liang ka US Secret Service ruh ka la pdiang ia ka jingtlot bad jingbym shym lah jong ka ban ai ka jingiada paka na ka bynta utei u president barim jong ka ri ha ka jingialang ilekshon ha Pennsylvania ha ka 13 tarik u Naitung.
