Shillong, Nailur 17
Ka Myntri kaba peit ïa ka tnat ka koit ka khiah ka Jylla ka Kong Ampareen Lyngdoh ka la ong ba ka la leit khnang sha Japan ban khmih bad sakhi dalade ïa ki nurse na kane ka Jylla kiba trei ha ki jaka sumar namar ki la don sa kiba batai ban ïalam bakla ïa kane ka sienjam kaba la shim da ka Sorkar na ka bynta ki samla ban ïoh kam ban leit trei shabar ri.
Hynrei ka jingshisha ka long ba ka Japan ka dang donkam shuh ïa ki briew na Meghalaya ha ka kam nurse bad ban trei ha ka tnat kaba ïadei bad ka kam rep.
Haba ïakren bad ki nongthoh khubor ha ka Sngi Ba-ar, ka Kong Ampareen ka la ong ba ki la don sa kiba sdang ban pynsngewthuh bakla ba ki nurse kiba ka Sorkar MDA ka phah sha Japan ki dei kiba leit ban sumar ïa ki ‘riew tymmen, hynrei ka jingshisha ka long ba kine ki nurse kiba ka Sorkar ka la plielad ban ïoh leit trei sha Japan ki dei kiba trei ban ai jingshakri ha ki jaka sumar.
Ka la ong ba hadien ba kine ki nurse na Meghalaya ki la dep ban ai ka jingshakri san snem, kin sa ïoh jingithuh ruh ha ka Japan bad kan long ka jingmyntoi ïa ki.
Ka Kong Ampareen ka la ong ba ka Japan ka dang donkam shuh shuh ïa ki nurse na Meghalaya ban leit trei ha katei ka ri bad na ka liang ka Sorkar Jylla ruh kan thaw lad kumno ban phah shuh shuh ïa ki nurse kaba long shisha ka lad kaba ai jingmyntoi.
Ka la ong ruh ba kane ka jingleit jong ka sha Japan ka la long shisha ka jingmyntoi namar ka ïoh ban pyntikna ba ki nurse kiba la phah na Meghalaya ki don ha ka jaka trei kaba shngaiñ ha ki bynta bapher bapher ka Japan.
“Lada ki don ki briew kiba pyrkhat ba kane ka jingleit jong nga sha Japan ka dei kaba shu sepei ne long leh nohei, kita ki briew ki don ka hok ban don kum kata ka rukom pyrkhat, tangba ka jingleit jong nga sha Japan ka long ka jingmyntoi khamtam ba ka ïoh ruh ban ïakren bad ki briew kiba donbynta ban rep tit bad pynïaid ïew ïa u tit kum u tit Shitake.
Ka Kong Ampareen kaba dei ruh ka Myntri kaba peit ïa ka kam rep, ka la ong ha kane ka jingleit jong ka sha Japan, ka la long shisha ka jingmyntoi namar ka la ïoh ban sakhi ïa ki nurse na ka Jylla kiba trei ha ki jaka ai jingsumar, nalor ka jingïohlad ruh ban ïakren bad ki briew kiba peit ïa ka kam rep kiba la pynsngew ba donkam ruh ïa ki briew na Meghalaya ban trei ha ka tnat kaba ïadei bad ka kam rep.
Kum ban pynkynmaw, lyngba ka jingplie lad ka Sorkar Jylla, ki don kumba 26 ngut ki nurse na Meghalaya kiba la leit trei sha Japan mynta la jan dap shisnem.
