Shillong, Nailur 17
Ka Hill State People’s Democratic Party (HSPDP) Youth Wing Sengkmie ka pynpaw ïa ka jingpyrshah kaba jur ïa ka jingthmu ban pynlong ïa ka ‘Yatra’ kaba kyrteng ka ‘Gau Swachh Staphana Bharat Yatra’ kaba la thmu ban pynlong ha ka 2 tarik Risaw, 2024 hapoh ka Jylla.
Ha ka shithi ba la phah sha u Myntri Rangbah ka jylla Conrad K Sangma ha ka Sngi Ba-ar, u President ka HSPDP Youth Wing u Bah Korbarlang Syiemlieh u la pynpaw ba ka don ka jingma ba kane ka lah ban pynthut ïa ka suk ka saiñ bad wanrah ka jingsngewpher jaidbynriew lada ka sorkar ka shah ban pynlong ïa ka yatra, kaba thmu ban pynbna ïa ka masi kum ka kmie jong ka Ri.
U Bah Korbarlang ha kane ka shithi u la ong, hooid kum ka seng ka sngewthuh ïa ka jingdonkam ban kyntiew ïa ka bit ka biang jong ki mrad bad ka jingkhuid, hynrei ki ngeit ba kane ka ‘Yatra’, ka lah ban wanrah ïa ka jingsngewpher jaidbynriew, ban kyntiew bad ka ban ktah pat ïa ka shongsuk-shongsaiñ.
Shuh shuh, u la ong ba kane ka ‘Yatra’ ka lah ban mih ka jingïakynad bad ka jingkulmar ha ka imlang sahlang, ka lah ban don ka jingpynshlur ban ïa pyrkhing bad ym kheiñ kor ïa ki aiñ ki kanun nalor ka jingpynïadonbynta jong ka kynhun Gau Rakshah ki long ki jingsngewkhia kiba jur ïa ki nongshong shnong ka Jylla kiba pyrshah jur ïa ka thong bad jingthmu jong ka yatra. Ka lah ban mih kaei-kaei kaba lah ban pynbitar ïa ki nongshong shnong, kaba lah pat ban pynmih ïa ki jingjia ki bym sngewtynnad.
“Nga kyrpad rit ba phin kyntait ban ai jingbit ban pynlong ïa ka Yatra ban pynlong kumba la pynbna da ki nongpynïaid bad ban pynthikna ba kino-kino ki yatra ne kino-kino ki kam hapoh ka Jylla ki dei kiba la leh da ka jingburom lang ïa baroh ki jaidbynriew ba im ha ka,” la ong u Bah Korbarlang.
