Nongstoiñ, Nailur 17
Ki nongïalam shnong bad ki nongshong shnong ba kynthup ïa ka shnong Nongmawlong, Nongsohram, Nongma bad Nongmawleiñ kiba hap hapoh ka Langpih Sector ki la pynpaw ïa ka jingpyrshah kaba jur hakhmat ki bor pynïaid District ka West Khasi Hills halor ka jingwan jurip surok jong ka Assam ha ka thaiñ Langpih kaba la jia ha kine ki khyndiat sngi ba la dep.
Katkum ka tyllong khubor, la ïathuh ba halor katei ka bynta, ha ka 17 tarik mynta u bnai ki bor pynïaid District ka West Khasi Hills ha ka jingïalam jong u Bah MA Challam, MCS Additional Deputy Commissioner (Revenue) West Khasi Hills ha ryngkat ka jingïadonlang u IC Langpih BOP ki la leit sha katei ka thaiñ bad pynlong ruh ïa ka jingïalang ha Nongma Dorbar Hall.
Ka khubor ka ïathuh ruh ba ha katei ka jingïalang, la wan ban ïa shimbynta da ki nongïalam shnong ha ryngkat ki riew rangbah jong kitei ki shnong lem bad ka jingdonlang ki dkhot na ka Khasi Students’ Union (KSU) West Khasi Hills.
Ka tyllong khubor ba la ïoh lum, la ong ba ha kane ka jingïalang bad ka jingïakynduh jong ki bor District ka West Khasi Hills ba na ka liang ki trai shnong ki pyrshah jur ïa ka jingjurip ba la leh da ka Assam na ka bynta ban shna ïa ka surok ha lynti ban leit sha Sohmarang lyngba ka shnong Nongdronpara, Nongmawlong, bad ka shnong Nongmawlein bad Nongsohram.
Shuh shuh, na ka liang ki nongshong shnong ki la pynbor ïa ka bor synshar District ban sdang ïa ki kam pynroi kum ka jingshna ïa ki hospital, ki skul, ki surok bad kiwei kiwei ha ki shnong jong ki.
Na ka liang u samla Biangboy Sangriang, President ka KSU Ri Mulliang Circle u la ong ba hadien ba ka KSU kala ïoh ïa ka jingtip ba ka sorkar Assam kala leit ban jurip ïa katei ka thaiñ, ka KSU naduh ka sngi nyngkong jong ka taïew ka la leit ban buh ïa ka jingthoh sha u Deputy Commissioner ka West Khasi Hills hynrei ha kane ka sngi ruh ki leit ha katei ka jaka ban ïakynduh ïa ki para doh para snam. Na liang ka seng ka la ïoh ruh ban ïakren shibun kiei-kiei hapoh katei ka thaiñ bad kawei ka sur kaba ki briew ha katei ka dong ka thaiñ ka long ba na ka por sha ka por ki ïakynduh ïa ki jingeh, ki ïakynduh ïa kita ki jingshah pyndik, ka jingshah leh donbor ha kiwei pat kum ka Assam.
“Kaei kaba ka seng ka lap, ngi dap da ka jingsngew lung mynsiem haba ka sngap ïa kiei-kiei ba ki para doh para snam ki ïakynduh ha kane ka jaka ïa kaba ngi lah ban ong ba ki dei ki briew kiba ieit shisha ïa ka Bri u Hynñiewtrep, ki briew kiba kheiñ duh shisha bad ki briew kiba eh rang ha kaba ka seng mynta ka sngi ka lap ba ka sur kaba hakhmat eh ka long ba ki kwah ban ïoh noh mardor ïa ka surok, namar ki la mad ïa ki jingeh ban leit ha ki ïew ki hat khamtam ha ka pang ka shitom bad ïa kane ngi la lap hi da la ki jong ki khmat,” la ong u samla Biangboy.
U samla Biangboy u la ong ba ka KSU ka kyntu ïa ka Sorkar Jylla ba ka dei ban theh ïa ki lad pynroi sha katei ka thaiñ la ka long ha ki skul, ki jaka sumar, ki surok namar ka dei kawei kaba ai mynsiem ïa ki briew kiba shong ba sah kane ka dong bad ka thaiñ.
Shuh shuh, na ka liang une u nongïalam ka KSU u la buh ruh ïa ka jingkylli, balei ba ka sorkar ka iehnoh beiñ ïa ki briew bad ki nongshong shnong kiba don ha katei ka dong bad ka thaiñ, ha kaba u la bynrap ruh ba ha ka jingshisha la dei ban peit kham kyrpang ïa ki paradoh para snam kiba don ha ki bynta khappud namar ki don hapdeng ka jingshong syier bad hapdeng ka jinglynga, hapdeng ka jingpisa hynrei balei pat ka sorkar ka pynslem ban theh ïa ki kam pynroi.
Ha kajuh ka por, u samla Biangboy u la ong ruh ba ka KSU ka kyntu ïa ka sorkar Assam ba kam dei ban pyndik bad leh kano-kano ka jingpynsyier ïa ki paidbah nongshong shnong namar haduh mynta hi ka dang don hapoh ka jingïapynbeit ha baroh ar ki sorkar.
U samla Biangboy u la ong ba ka seng ka kren da kaba shai ba kan don ryngkat bad ki briew jong katei ka dong ka thaiñ. Lada ka jingïai pyndik kan jia na ka por sha ka por, ka KSU ruh ka long kaba la pynkhreh namar kam lah ban shah bad ban shu peit ïa ka jingwan leh donbor.
Na ka liang jong u Bah MA Challam u la ong ba ka jingwan na ka liang jong ki bor District ka long ban pyntikna ba kan don ka shong suk shnong saiñ jong ki paidbah bad ruh ban tohkit halor kata ka jingwan sorjamin ka sorkar Assam khlem da ai jingtip sha ki bor District bad sha ki bor shnong katei ka thaiñ. U la pynpaw ruh ba na ka liang jong ki bor District ka WKHD kan sa leh la ka jong ka kamram ban ïakren bad ki bor District ka Kamrup ha Assam halor katei ka jingwan jong ki.
