Shillong, Nailur 17
Ka Sanmer SC bad ka Kharang SC ki la ïoh jingjop ha ka lympung ïalehkai Third Division Football League 2024 ba la pynïaid da ka Shillong Sports Association ha ka Sngi Ba-ar ha SSA Stadium, Polo.
Ha ka jingïakhun kaba nyngkong, ka Sanmer ka la pynliem noh ïa ka Lamlynti FC da 3-2 kol. Tang mar ïa sdang ka jingïalehkai, ka Sanmer ka la ïoh ban pynkhih jar nyngkong na ka daw ka jingbakla thep da u rangïalehkai ka Lamlyngti u Damutskhem Umdor ha ka minit kaba 8.
Kane ka shi kol ka la nang pynïoh mynsiem ïa ka Sanmer bad tang hadien katto katne por ka la thep biang ïa ka kol kaba ar ha ka minit kaba 29 lyngba u Banshan Dkhar na ka bynta ban tam da 2-0 kol ha ka kylla step.
Hadien katto katne por ki rangïalehkai ka Lamlynti ki la pyrshang ban ïakhun tyngeh bad dei ha ka minit kaba 61 ba ka la lah ban pynphai kylla lyngba u Ksankupar Khongsain bad hadien saw minit ka la pynbud biang ia ka kol kaba ar lyngba u Batskhem Thongnirit.
Ha shwa ban wai ka por, ka Sanmer ka la ïoh ban thep biang ïa ka kol ba lai bad kaba khatduh lyngba u Ryan Ksing ha ka minit kaba 75 na ka bynta ban jop syndon hadien ba ka Lamlynti kam lah shuh ban pynphai kol haduh kaba kut jong ka jingïalehkai.
Haba phai sha kawei pat ka jingïakhun, ka Kharang SC ka la pynliem noh ïa ka Pomlakrai SC da 3-0 kol. U Balajied Lyngwa u la ioh ban thep ar kol ha ka minit kaba 26 & 47 bad u Krapjingshai Lawai (24).
Ka jingïalehkai jong ka Second Division ha ka sngi Balang kan long hapdeng ka Laitlyngkot SC pyrshah ïa ka Jongksha SC ha ka por 12:30 mynsngi, katba ka Nongkrem SC ïa ka Lumshyiap SC ha ka por 3:30 janmiet.
