Shillong, Nailur 17
Ka nongbah Shillong ka lah ban ïoh pynlong kumba ar ne lai tylli ki jingïalehkai jong ka Indian Super League (ISL) mynta ka aïom bad kane ka lah ban urlong ha u snem ban wan, la pynpaw u CEO ka NorthEast United FC u Mandar Tamhane.
Kane ka jingthmu ban wanrah da katei ka kynhun ïalehkai ISL ka long hadien ba la lah ban pyndep ïa ka Jawaharlal Nehru Stadium kaba don ha Polo bad ka jinglah ban pynurlong ïa ki katto katne ki jingïalehkai jong ka Durand Cup mynta u snem wat la ki dang don katto-katne kiba dang sahteng.
Kumba ka paw ka tnat jngohkai jong ka Sorkar Jylla ka la kyrshan pisa (sponsored) ïa katei ka kynhun ïalehkai jong ka NorthEast United ha ka ISL.
“Kham ha shwa ki la don katto-katne ki jingeh ha ka jingtei ïa katei ka stadium, hynrei ïa kine la lah ban pynbeit. Ka sorkar Meghalaya bad ka tnad ïalehkai ki la ïatreilang haduh katta-katta ban pynthikna ba ïa kine ki jingtei yn pyndep hapoh kine ar ne lai bnai ban wan,” la bynrap u Tamhane.
Lada baroh ki ïaid katkum ka jingthmu, ïa ki jingïalehkai ISL lah ban pynlong ha Shillong hapoh u Kyllalyngkot ne Rymphang jong u snem ban wan. “Ngi kyrmen ban pynlong ym duna ïa ar ne lai tylli ki jingïalehkai ha Shillong, tangba dei ban pyndep ïa baroh ki jingdonkam,” u la bynrap.
Kine ki jingïalehkai kiba la thmu ban wanrah ha kane ka nongbah kin dei ki jingïalehkai ha la ïing jong ka NEUFC.
Hynrei lada ym lah ban pynurlong mynta ka aïom, u Tamhane u la pynthikna ba ki jingïalehkai ISL yn pynlong noh ha Shillong ha ka aïom ban wan.
