Shillong, Nailur:
Ka Voice of the People Party (VPP) ha ka Lah Sngi U Blei ka la kyntu jur ïa ka Sorkar Jylla ba kan ym ai jingbit ïa ka ‘Gau Dhwaj Sthapana Bharat Yatra’ kaba la thmu ban pynlong ha nongbah Shillong ha ka 2 tarik u Risaw.
“Na ka liang ka VPP, nga kwah ban pynpaw ïa ka jingsngewkhia ha kaba ïadei bad ka jingïalang kaba la tyrwa ban pynlong ïa ka ‘Gau Dhwaj Sthapana Bharat Yatra’, kaba la buh ban long ha Shillong ha ka 2 tarik u Risaw, 2024. Wat la ngi kyrshan pura bad pynneh ïa ka nongrim ka jinglaitluid jong ka jingmane niam, kaba la shon ha ka Riti Synshar ka ri, ngi sngewkhia shi kat dei ïa ki jingktah kiba lah ban mih na kum kane ka prokram haba phai sha ka suk ka saiñ ha ka imlang sahlang jong ka Jylla,” la ong u General Secretary ka VPP uba long ruh u MP ka Shillong Parliamentary konstitwensi, Dr. Ricky A.J. Syngkon ha ka shithi ba la phah sha u Myntri Rangbah ka Jylla, u Conrad K. Sangma.
U la ong ruh ba ka VPP ka ngeit ba ka jinglaitluid haba ïadei bad kano-kano ka jingngeit ka dei ka hok ba kongsan, hynrei lada kata ka jinglaitluid jong ka jingngeit ka pynthut pat ïa kiwei ne pyrshang ban pynbor ïa ki jingngeit ha kaba ïadei bad kaei kaba ki briew ki dei ban bam, kumno ki dei ban im, ne kaei kaba ki dei ban ngeit, kata ki buh jingma ïa ka jinglong tynrai jong ka imlang-sahlang.
Haba kdew ba ka Meghalaya ka dei ka Jylla kaba la tip na bynta ka jinglong ïar ha kiba bun ki liang, ka suk ka saiñ, bad ka jingburom markylliang hapdeng ki jaidbynriew bapher-bapher, u MP u la ong ba kano-kano ka jingjia kaba lah ban pynmih ïa ka jingkulmar ne ki jingïakynad hapdeng ki jaidbynriew bapher-bapher dei ban da khmih bad phikir bha.
“Ngi sngewkhia ba kane ka ‘Yatra’ ba la thmu ban pynlong ka lah ban wanrah ïa ka jingïapait-jingïapra bad pynthut ïa ka shong suk – shong shngaiñ hapdeng ki jaidbynriew ha Meghalaya. Dei ban burom ïa ka jingpher ha ka imlang-sahlang bad latiri jong ka Jylla, bad ngim lah ban ai lad ïa ki prokram kiba lah ban pyntroiñ ne tynjuh ïa kane ka jingïalong ryntih,” u la ong.
U Dr. Syngkon u la ong ba kiba kum kine kiei-kiei ki lah ban wanrah ïa ka jingbym ïasngewthuh jingmut bad jingbitar, ha kawei ka liang kaba lah pat ban ïalam sha ka jingbym ïasngewthuh jingmut ha ka imlang sahlang.
Shuh shuh u la bynrap ba da kaba buh jingmut ïa kine kiei-kiei baroh haba phai sha ka imlang-sahlang jong ka Jylla, ka seng ka kyntu jur ïa ka Sorkar ban ym ailad ha ka ban pynlong ïa katei ka ‘Yatra’.
“Ka jingshngaiñ, ka jingsuk, bad ka jingïatylli jong ki paid nongshong shnong ka Meghalaya ka dei ban long ka mat kaba hakhmat eh jong ka Sorkar, bad ym dei ban ailad ïa kano-kano ka prokram kaba thmu ban pynthut ïa kine ki nongrim,” la ong u MP.
