Jowai, Nailur 17
U Myntri ka tnad ïalehkai jong ka Sorkar Jylla u Bah Shakliar Warjri ha ka Lah Sngi U Blei u la hiar sha Jowai ban lum jingïalang ha kaba ïadei bad ka jingpynkhreh na ka bynta ka 6th Meghalaya Games 2025 ka ban long ha Jowai bad Wahïajer, West Jaiñtia Hills.
Ha katei ka sngi la ïadonlang u MLA ka Jowai u Wailadmiki Shylla, ki dkhot ka Meghalaya State Olympic Association, State Sports Council kumjuh ki ophisar na ki tnad treikam sorkar bapher bapher jong ka District bad baroh kiba don bynta ha ka ban pynlong ïa ka Meghalaya Games ha Conference Hall ka Soil and Water Conservation, Jowai.
“Ka Meghalaya Games ka dei ka rynsan ban kyntiew ïa ki khun samla ka Jylla kiba don ka jing-angnud ban nangkiew shaphrang ha ka kam ïalehkai. Ngi ngeit ba lyngba ka Meghalaya Games kan long ka jingïohnong ïa ki khun samla kiba don ka sap ha ka kam ïalehkai,”la ong u Bah Warjri haba pynpaw sha ki lad pathai khubor hadien ka jingïalang.
U Myntri u la pyntip ruh ba ha ka jingïalang la ïakren ban pynrung ar ne lai tylli ki jait ïalehkai ha ka Meghalaya Games 2025 na ka bynta kiba duna dkhot met namar ma ki ruh ki don ïa ka hok ban pyni ïa ki sap ka phong ïalehkai.
Shuh shuh u Bah Shakliar u la pyntip ba la ïoh ruh ban buh ïa kawei ka pung jngi ne ka swimming pool bad nalor katta u la ong ruh ba na ki lympung Meghalaya Games kiba la dep, la lah ruh ha ka ban ïoh ïa ka lad ban pynbha ïa ki skul bad ki kolej khnang ba ynda haba la dep kane ka lympung ka jingïohnong kan dei ïa kine ki jaka kiba pyndonkam kum ki jaka ban shong ban sah ki nongïalehkai ha ka por ba pynlong ïa ka Meghalaya Games.
