Jowai, Nailur 17
Haduh saw ngut ki briew ki la mynsaw jur hadien ba ki la shah tied pyrthat kaba la jia ha ka shnong Mawshadep kaba hap hapoh ka Laskeiñ Block ha West Jaiñtia Hills.
Katkum ka khubor kaba la ïoh lum la ong ba kane ka jingjia shah tied pyrthat jong kitei ki saw ngut ki briew ka la jia ha ka 16 tarik mynta u bnai ha ka por kumba 2 baje eiei mynsngi.
La ïathuh ba kane ka jingjia ka la jia ha ka por ba kine ki saw ngut ki dang rieh slap ha uwei u dieng jri hadien ba ki dang wan phai na kawei ka ïing ïap briew bad kane ka jingjia ka la wanrah ka jingmynsaw jur ïa kine saw ngut.
Kine kiba la mynsaw ki dei kiba la tip kyrteng kum u H Ting na ka shnong Mooshrot, u B Tyngkan na Niawkmai, u P Sten na Mukroh bad u S Lyngdoh na ka shnong Sahsniang.
Na ka liang ki ‘riew paidbah kiba ïohi ïa kane ka jingjia mar-mar ki la pynïoh jingïarap ïa kine ki briew kiba mynsaw ban pynkit sha ki jaka ai jingsumar. Napdeng kine ki saw ngut la ïathuh ba ar ngut ki la kham jur ka jingmynsaw.
