Aizawl, Nailur:
Ka kynhun lehnoh CDF-HuaIngoram, ka la phah ïa ka shithi panmap sha Village Council President (VCP) jong ka Zokhawthar ka jaka sor jong ka Champhai distrik, ha kaba ïadei bad ka jingrahbor jong ki ïa arngut ki khynnah samla shynrang kiba dei ki Mizo ha kaba sdang jong une u bnai.
Ka shithi na u General Secretary ka CDF-HuaIngoram, u Lalrodinga ka ong, “Da kaba kdew halor ka rai ba la shim ha ka jingïalang kaba la long ha ka 11tarik, Nailur, 2024, hapdeng ka Village Council bad ki nongmihkhmat na baroh ki seng treimon sngewbha bad ka CDF-Hualngoram, nga kwah ban pynpaw ka jingsngewnguh sha baroh ki dkhot jong ki seng treimon sngewbha na ka bynta ka jingïatreilang jong phi ban ïoh ïa ka jingïasngewthuh jingmut ban wanrah ïa ka jingpynïasuk hapdeng ka jingïapher jingmut jong ki samla ka Zokhawthar bad ki dkhot jong ka kynhun CDF-Hualngoram.”
“Nga kwah ruh ban pynshai ba kitei ki arngut ki samla na Zokhawthar kiba la shah kem halor ka jingsuba ba ki la thombor bad pynmynsaw ïa u dkhot jong ka kynhun CDF-Hualngoram uba la mynsaw ha kaba kim shym la ithuh ba ki dei ki nong India katba ki dang don ha ka jingshah set jong ki. La pyllait noh mardor ïa ki ynda la pynthikna ïa ka jinglong nong India jong ki.”
“Na ka liang ka CDF-HuaIngoram, nga pan map naduh ka mynsiem na ka bynta kino kino ki jingpynkheiñ kyndon khlem da thmu ïa kaba la jia ryngkhat na ka jingïasngewthuh bakla.”
Kumba la ïathuh, la ong ba ha kaba sdang jong une u bnai, ki la don arngut ki khynnah shynrang, kiba dang don ha ka rta kaba 15 snem bad 16 snem ka rta na ka shnong Zokhawthar jong ka Champhai distrik kaba don ha Mizoram ki la shah rahbor ha ka kynhun lehnoh Hualngoram jong ka Chin Defence Force (CDF).
Ha ka 1 tarik, Nailur, 2024, ka kynhun jong ki san ngut ki khynnah shynrang Mizo ki la leit sha Rih Dil Lake da ki ar tylli ki Kenbo (ki kali arshaka) ha kaba la pynsangeh ïa ki da ki dkhot ka kynhun CDF Huanlgoram bad ki la shah shoh ha ki shipai namar ka jingïania bad ïabuhdaw kaba hashwa jong ki katto katne ngut kiwei pat ki khynnah shnong jong ka Zokhawthar.
Katba lai ngut ki khynnah shynrang ki la lah ban phet krad, ki arngut ki khynnah shynrang ki la shah bat bad shah set ha ki lehnoh.
Ha kaba nyngkong la buh ïa ki ha ki jaka jong ka pung Rih Dil ha ki ar sngi bad hadien la pynkynriah noh ïa ki sha ka ktem jong ki CDF Huanlgoram kaba don ha ka shnong Seik ha ka 3 tarik, Naitlur, 2024.
Haba la poi ha shnong Seik, la set ïa kine ki arngut ki khynnah shynrang ha kawei ka phatok; bad ka tyllong khubor ka la ïathuh ba la pynshitom beiñ ïa ki ha kaba la ot ïa u shñiuh, kynthah sikret ha ka khlieh jong ki bad la lap ruh ba la phut jubor ïa ar tylli ki bniah jong uwei napdeng kine ki khynnah.
Hadien ka jingshim jingtuklar da ki Assam Rifles halor kane ka jingjia bad ka jingpynbor ïa ki shipai Chin National Army & CDF Huanlgoram, ïa kine ki arngut ki khynnah shynrang la pyllait noh ha ka janmiet jong ka 6 tarik, Nailur, 2024.
