New Delhi, Nailur:
Katkum ki khubor, la ong ba uwei u nong Pakistan uba la shah kynnoh ba u don ka jingiadei bad ka Iran ha kawei na ki kam thombor ha US, u la kyntait ba um shym la donkti eiei ha katei ka jingshah pharep ba u iatrei lang ban pyniap ia u nong-ialam jong ka America kum ka jingpynshitom beiñ halor ka jingpyniap ia u rangbah shipai Revolutionary Guards jong ka Iran, U Qassem Soleimani.
U Asif Merchant, 46 snem ka rta, u la shah wanlam hakhmat ka ïingbishar haba iadei bad ka jingkynnoh ba u ia don kti bad ki lehnoh ban wanrah ia ki kam thombor ha US bad kumjuh ruh haba iadei bad ka jingpyniap ia uwei u briew bad kumta u la shah wanlam hakhmat ka ïingbishar ban pynsngap ia katei ka jingshah pharep jong u hakhmat u Magistrate Judge Robert Levy jong ka US ha Brooklyn. Na ka liang une u nongbishar u la hukum ban kem bad bat ban noh shwa shipor ia u Merchant katba dang pynsahteng ia ka jingbishar kaba kham bniah haba iadei bad kitei ki mat haneng.
Ki nongmudui jong ka sorkar pdeng ki ong ba u Merchant u la pynlut por ha Iran shwa ba un leit sha America ban wad briew na ka bynta katei ka jingthmu.
U Merchant u la iathuh ha u nongpyntip ba rieh ba u thmu ruh ban tuh ia ki kot ki sla na kawei ka tnat bad ban pynlong ia ki jingiakhih ha America.
Kumta, la ong ba ia mynta hi, ym shym la lap kano-kano ruh ka jingpynpaw ban pyni ba u Merchant un iadon kti ne suhbuit lang halor ka jingthmu ban pyniap ïa u Trump ha ka madan ïalehkai golf jong u ha Florida kaba la jia ha ka Sngi U Blei, lane ka jingshah siat kyrpang jong u kyrtong President ka Republican ha ka jingïalang ha Pennsylvania ha u Naitung jong une hi u snem.
Kumta, ia u Merchant la kem noh bad la buh ia u hapoh ka Metropolitan Detention Center kaba don hapoh Brooklyn hi, naduh ba la kem ia u ha ka 15 tarik u Naitung na ka nongbah Texas.
