Shillong, Nailur 18
Ka Meghalaya Football Association (MFA) ka la shim ïa ka rai ban pynlong ïa ka quarter final jong ka lympung ïalehkai Meghalaya Youth League bad kumjuh ka Meghalaya State League (MSL) ha u Risaw mynta u snem.
Ïa kane ka rai la shim ha ka jingïalang jong ka executive committee kaba ka long ha ka Sngi Balang ha ka shlem treikam jong katei ka synjuk kaba JN Stadium, Polo.
U Secretary ka MFA u Bah Sunesh Syiem haba pynpaw ha ki lad pathai khubor, u la pynpaw ba ka wat kaba nyngkong jong ka Meghalaya Youth League kan kut ha ka 28 tarik mynta u bnai. Ngi la pynskhem pat ïa ki tarik ban pynlong ïa ki jingïakhun quarter final ba la buh ban pynlong naduh ka 5 bad ha ka 7 tarik jong u Risaw. Katba ki semi final la buh ban long ha ka 9 tarik, katba ka phainal la buh ba kan long ha ka 11 tarik u Risaw.”
U Bah Sunesh u la pyntip ban pynlong ïa kitei ki jingïakhun ha MFA Third Ground Polo bad ha SAI Stadium, katba ïa ka phainal pat la buh ban pynlong ha SSA Stadium kaba ha First Ground, Polo.
Haba ïadei pat bad ka lympung ïalehkai jong ka Meghalaya State League, u Bah Sunesh u pyntip ba ka jingïalang kaba la long mynta ka sngi ka la shim ïa ka rai ba kan sdang noh pat ïa ka 26 tarik jong u Risaw.
“Ïa kane ka lympung la rai ban pynlong ha ki 6 tylli ki jaka ha kaba yn phiah ïa ki kynhun ha ki 6 tylli ki group ban don mar saw tylli ki kynhun ha kawei pa kawei ka group. Ki klob jong ka Shillong Premier League kin ïoh ban ïashim bynta lai tylli kaba kynthup ïa ka lahduh jong ka MSL ba la lah ka Rangdajied Unityed FC, kumjuh ka lahduh jong ka SPL ka Mawlai SC bad sa kawei pat kan dei ka Shillong Lajong FC.
Ïa kine ki lympung ïalehkai yn kyrshan lang da ka tnat ïalehkai jong ka Sorkar Jylla.
