Khliehriat, Nailur 18
Ka Lakadong Ummat SCC, Sonapyrdi FSC bad Ratacherra Cultural & Sports Club ki la ïoh jingjop ha ka lympung ïalehkai Third Division Football Tournament ba la pynïaid da ka East Jaiñtia Hills District Football Association (EJHDFA).
Ha kane ka jingïakhun kaba la long ha madan Artificial Turf kaba ha Deinshynrum, ka Lakadong Ummat SCC ka la pynliem noh ïa ka Bataw FC da 3-2 kol. Ïa kine la thep da u Edifirst Shadong ha ka minit kaba 16, kumjh u Ebormi Lyngdoh (31) bad Winison Sumer (37). Katba na ka Bataw la thep da u Jelmiki Lyngdoh (39) bad u Ram Lakhi (70).
Ha ka jingïalehkai kaba bud, ka Sonapyrdi FSC ka la pynliem da 1-0 kol ïa ka Musniang DWKSC bad ïa kane la thep da u Kitbok Sutnga ha ka minit kaba 63.
Ha ka jingïalehkai kaba khatduh jong kane ka sngi, ka Ratacherra Cultural & Sports Club ka la pynliem noh ïa ka Umrasiang United SC da 3-1. Ïa kine la thep da u Misaial Bareh ha ka minit kaba 6 bad u Gradely Mylliem u la thep ar kol ha ka minit ba 64 & 67. Katba ïa ka shi kol jong ka Umrasiang United la thep da u Jemiki Rymbai (70).
