Shillong, Nailur 18
Ka jingshah tuh jong ki kali bad kumjuh ruh ki ar shaka ka la long kaba jur bha ha kine ki sngi bad taïew ba la dep ba la sakhi na kylleng ki bynta jong ka nongbah Shillong bad ruh na ki bynta jong ka rilum Garo.
Katkum ka khubor na ki pulit la ïathuh ba tang hapdeng ki lai sngi kata naduh ka 13 haduh ka 15 tarik mynta u bnai, ka la don ka jingshah tuh jong 8 tylli ki ar shaka bad kawei ka kali na ki jaka bapher bapher.
Ka khubor na ki pulit ka la ong ba u Andrewfield W Nongrum u la ujor sha ki pulit ba ha ka miet jong ka 13 tarik mynta u bnai, ki runar bym lah ban tip ki dei kiei, ki la tuh ïa ka ar shaka jong u na 3 Mer, Lumpdeng ha Upper Shillong.
Nangta, u Wanbiang Jyrwa ruh u la ujor sha ki pulit ba ha ka step jong ka 14 tarik mynta u bnai, ki runar bym lah ban ithuh, ki la tuh ïa ka kali Mahindra pick-up kaba don ïa u nombor ML05-H-3499 na ka thaiñ Jaïaw Langsning, Shillong.
U Abdul Akram Hussain ruh u la ai ka jingujor sha ki pulit ba ha ka miet jong ka 13 tarik mynta u bnai, ki runar bym lah ban ithuh, ki la tuh ïa ka kali ar shaka ka jong u, kaba don ïa u nombor AS01-EU-5372 na ka jaka sah ka jong u, kaba don ha Sawlad, Demthring, Shillong.
Kumjuh ruh u Suman Banik u la ujor sha ki pulit ba ha ka miet jong ka 13 tarik mynta u bnai, ki runar ïa kiba ym lah ban ithuh, ki la tuh ïa ka kali ar shaka ka jong u, kaba don ïa u nombor ML05-X-5063) najan jong ka jaka jong u ha Sawlad, Demthring, Shillong.
Ha kawei pat ka khubor, kawei ka longkmie ka la ujor sha ki pulit ba ha ka step jong ka 14 tarik mynta u bnai, ki runar bym lah ban ithuh, ki la tuh ïa ka ar shaka jong ka kaba don ïa u nombor ML05-Y-8133) najan jong ka St. Anthony’s College, Shillong.
U Shikkur Ali bad u Ayub Ali ruh ki la ujor sha ki pulit ba ha ka 15 tarik mynta u bnai ki la lap ba ka ar shaka ka jong ki kaba don ïa u nombor AD13-P-2644 bad AS13-P-7061, ka la jah na Dhobitola, Jhalupara, Shillong.
Kumjuh ruh kane ka jingshah tuh jong ki ar shaka, ka la jia ruh ha rilum Garo, ha kaba u Suman Mondal u la ujor sha ki pulit ba ha ka step jong ka 13 tarik mynta u bnai, ha ka por kumba 8.30 eiei, ka ar shaka jong u, kaba don ïa u nombor ML08-H-5445 ka la jah na ka jaka ba pynïeng ha Fancy Valley, Tura ha West Garo Hills. Na ka liang jong u Tennybirth Ch Momin ruh u la ujor sha ki pulit ba ha ka miet jong ka 14 tarik mynta u bnai, ki runar ki bym lah ban ithuh ki la tuh ïa ka ar shaka ka jong u na Chipakgram, Mendipathar ha North Garo Hills.
