Shillong, Nailur 18
Ha ka step jong ka Sngi Balang ka 18 tarik mynta u bnai, kawei ka bos kaba kamai sha Balat ka la kylla noh harud surok tang mar shu poi ha thaiñ Dangar ha East Khasi Hills District.
Katkum ka khubor kaba la ïoh lum la ong ba kane ka la jia ha ka por kumba 10 baje mynstep bad ka jingkylla jong kane ka bos kaba don ïa u nombor ML12-1270 ka la long ha ka por ba ka dang thmu ban ailad ïa kawei ka kali Bolero ban ïaid shakhmat kaba dang wan na ka thaiñ Dangar.
Kane ka bos ka dei kaba kamai na Shillong bad ka dei ruh kaba ju mih na kane ka jaka man ka sngi ha ka por 6:30 mynstep. Phewse, ha kane ka sngi palat mar ïa poi ha katei ka bynta jong ka surok bad ha ka jingïaleh ban ailad ïa katei ka kali Bolero, ka la kylla pynban khram sharud surok.
Katkum ka jingïathuh jong ki ‘riew paidbah la ong ba ka jingkylla jong kane ka bos ka dei namar ka jingdon jong ka thliew harud surok bad dei na kata ka daw ka la pynlong ïa kane ka bos ban kylla hadien ba ka shaka ka la ngat ha katei ka thliew. Wat la don kiba shong hapoh ka bos hynrei la ong pat ba ki don tang khyndiat ngut kiba la mynsaw malu-mala. Ha kane ka bos la ïohi ruh ba ka la kit ïa ki marbam ban pynpoi sha ki shnong kiba don ha Balat kaba hap ha South West Khasi Hills District.
Ka jingkylla jong kane ka bos ka la pynduh nong ïa ki paidbah nongleit nongwan na Shillong sha Mawsynram sha Balat khamtam kiba leit trei leit bylla man ka sngi.
