Ka Kynhun Myntri jong ka Sorkar Pdeng hapoh ka jingïalam u Myntri Rangbahduh, u Narendra Modi ka la ai jingmynjur ban pynlong noh tang kawei ka ilekshon ka ban sa pynlong ha kajuh ka por ha baroh kawei ka ri India, lane ka ‘one nation, one election.’
Kane ka jingmynjur jong ka Kynhun Myntri ka la long halor ka kaiphod ba la wanrah da ka High Level Committee ïa kaba la khlieh da u President barim ka ri, u Ram Nath Kovind. Ka ‘High Level Committee – One Nation, One Election’, ba la thaw ha ka 2 tarik Nailur, 2023, ka la dep ban pan jingmut na ki paidbah halor ka jingthmu ban pynkylla ïa ki aiñ ki kanun khnang ban ïoh pynlong lang ha kajuh ka por ïa ki ilekshon ha ka Ri baroh kawei.
Katkum ki kyndon, katei ka ‘High Level Committee’ la donkam ban ai jingmut ban thaw ïa ki kyndon aiñ bad kiwei pat ki kyndon khnang ban lah pynlong lang ha kajuh ka por ïa baroh ki ilekshon ha India. Ka hap ban ai jingmut ruh ban pynkylla ïa ka Riti Synshar bad ki aiñ ilekshon, jingpynkhreh ïa ki kot ba don ïa ki kyrteng ki nongthep ‘vote’, jingpynkhreh ïa ki EVM/VVPAT bad kiwei.
Halor kane ka kaiphod kaba la dep ban phah da ka High Level Committee, ngim tip la ki ‘riew shimet ne kynhun ne seng saiñpyrthei na Meghalaya ki la phah ne em ïa ki jingai jingmut jong ki bad la ki sngewïahap jingmut ne em ban pynlong lang ha kajuh ka por ïa ki ilekshon. Ha kane ka jylla jong ngi, ngi donkam ban jied ïa ki MP, MLA bad MDC. Man la ka san snem ngi jied ïa kine katkum ka samoi. Na ka bynta ka MP bad MLA, ka dei ka kamram jong ka Election Commission of India (ECI) ban pynbeit ïa ka por, sngi, tarik bad kiwei ki jingdonkam kumba long lem ha kiwei pat ki bynta jong ka Ri. Kum ka nuksa, ha u snem 2023, ngi la dep jied ïa ki 60 ngut ki MLA sha ka Ïingdorbar Thawaiñ ka jylla, bad ha u snem 2024 ngi la dep ruh ban jied ïa u MP sha Lok Sabha. Katba ïa ka ilekshon sha ki lai tylli ki Autonomous District Council, kita ka KHADC, JHADC bad GHADC pat ka dei ka kamram jong ka Sorkar Jylla ban pynbeit ïa ka por, sngi, tarik bad kiwei ki jingdonkam.
Ngi sngewthuh ba kane ka jinghap ïeng laiñ ba khah-khah ban thep ‘vote’ ban jied ïa ki MP lane MLA lane MDC ka ktah bha. Ngin hap ban ïa sngap ïa uwei-pa-uwei ne kawei-pa-kawei kyrtong bad kawei-pa-kawei ka seng saiñpyrthei kiba wan sha ki shnong ki thaw ban khroh ïa ngi ki nongthep ‘vote’. Baroh ki ai ïa ki jingkular ba laiphew jait laiphew skit haduh ba la kdang sa ban sngap namar ki jingkular ruh kim da ïapher than. Ha kajuh ka por pat, ka ilekshon MP, MLA bad MDC ki ïapher kawei na kawei pat. Ka MP ka kham dait thah naduh ka jingïalap ilekshon haduh ka jingshongshit jong ki paidbah. Ka jingshongshit ka kham paw bha ha ka ilekshon MLA bad bud sa ka ilekshon MDC. Lada ngi buh shwa sharud ïa ka jingshongshit, ngin shem ba ka jingbun palat ki ilekshon na uwei u snem sha uwei pat, ka pynngiah noh ïa ki katto katne ban mih ban leit thep ‘vote’.
Shisien pyrkhat, ka bha palat lada pynlong lang ïa ki ilekshon baroh ha kajuh ka por khnang ban ïa lait bunkam. Tangba kin don ruh ki jingeh kiba kum ka Sorkar Pdeng kan hap ban peit bad bishar bniah khamtam halor ki jingai jingmut jong katei ka Committee. Kumba la kdew haneng, ka rukom jied ka ïapher ha ka ilekshon sha ka Lok Sabha, Ïingdorbar Thawaiñ ka jylla bad District Council. Ki paidbah ki don la ka jong ka saiñpyrkhat bad jingangnud na kawei ka ilekshon sha kawei pat. Kam long kumjuh lait noh sa tang hangne hangtai. Lada pynlong ïa kine ki lai tylli ki ilekshon ha kajuh ka por ha Meghalaya, ka mut kiba bun kin don lai jingmut lane lai saiñpyrkhat – ïano ban jied kum u MP, MLA bad MDC. Ka la don ka khep ha Meghalaya ha u snem 1998 ha kaba la pynlong lang ïa ka ilekshon MP bad MLA ha kajuh ka por. Ka jingthep ‘vote’ ka la long lang ha kajuh ka ‘Polling Station’ bad ki la don artylli ki synduk ban thep ïa ki kot thep ‘vote’ lane ki ‘Ballot Paper’. Bad ka la long ka ilekshon kaba ïaid beit.
Kumta, katkum ka jingpynbna jong ka Sorkar Pdeng hadien ba la dep mynjur ïa ka kaiphod jong ka High Level Committee, ïa ka ilekshon ha ka ri baroh kawei yn pynlong ha ki ar tylli ki wat. Ha ka wat banyngkong, yn pynlong ïa ka ilekshon sha Ïingdorbar Thawaiñ Lok Sabha bad Ïingdorbar Thawaiñ ki Jylla bapher bapher, bad ha ka wat ba-ar, ïa ki ilekshon Municipal, Panchayat bad kiwei kiwei dei ban pyndep hapoh 100 sngi hadien ba la pynlong ïa ka ilekshon Lok Sabha bad ilekshon sha ki Ïingdorbar Thawaiñ ha kylleng ki Jylla.
