Imphal, Nailur:
Ki suba lehnoh ki la leh biang sa ïa kawei pat ka kam pyntriem ha shnong Mongbung Meitei kaba don ha Jiribam distrik jong ka Manipur, la ïathuh ki pulit hynnin ka sngi.
Ha kaba ïadei bad kane ka jingjia ki pulit ki la ïathuh ba ki lehnoh ki la siat da bun sien na ki tiar siat ba khlaiñ bor jong ki ha ka por 7 baje jong ka miet Sngi Ba-ar ha kaba kane ka la pynlong ïa ki pulit ba kin pynphai kylla ïa ka jingsiat.
Ha kane ka jingjia ym shym la don mano-mano ruh kiba mynsaw ha ka por ba don ka jingïasiat, la ïathuh ki pulit. Ki bor pahara ki la leit sha katei ka jaka ba la mih ka jingïasiat ban tem ïa ka jinglong jingman bad ka jingsiat ka la sangeh noh ha ka por 8 baje, mynmiet, la ïathuh uwei na ki heh pulit.
Ki bor ba dei khmih ki la khmih bniah ha kaba ïadei bad ka jingjia bad ki la kyntu ïa ki nongshong shnong ba kin ïatreilang bad ki bor pahara haba pynlong ïa ki jingleit thwet lehnoh ne jingleit khynra, la ong shuh shuh u heh pulit.
Ha kine ki ar sngi ba la leit, ki nongshong shnong ki la ïathuh ba ki la ïohi ïa ki Drone kiba bun kiba her najrong jong ka shnong Mongbung Meitei, la ong u heh pulit, kumba la ïathuh da ki nongshong shnong.
Ki bor pahara ha ka por ba ki la pynlong ïa ka jingkhynra ha ka thaiñ kaba ha Chanung bad ka shnong C Zoulen ha Imphal East district ki la ïoh ban kurup ïa kawei ka suloi shiktang ba la shna hi, uwei u kuli SLR Magazine, bad ki kuli ïasiat ha ka lah sngi U Blei, la ïathuh ka jingthoh kaba la wan na ki pulit.
