Jowai, Nailur 18
Haduh san ngut ki briew kiba suba donkti ha ka kam tuh ar shaka ki la ngat ha ka shrip jong ki pulit ka West Jaiñtia Hills District.
Kane ka la wan jia hadien ba u trai kawei ka ar shaka, u Miklan Paslein u la ujor da ka ejahar ha thanat Raliang pyrshah ïa kitei ki san ngut halor ka jingdonkti ban tuh ïa ka ar shaka jong u kaba dei ka Bike Royal Enfield kaba don ïa u Registration No: ML0-4G-7777.
Kine san ngut ki dei kiba la tip kyrteng kum u Steve Syngkon uba kam ïalade na ka shnong Iawthymme, u Heipormi Synnah uba kam na ka shnong Saphai, u Nisanki Lamare uba kam na ka shnong Saphai bad u Leader Suiam uba kam na ka shnong Molibang Shangpung bad uwei ba dang 16 snem rta.
U trai jong ka ar shaka ha ka ejahar u la ïathuh ba ka ar shaka jong u ka la shah tuh ha ka 17 tarik Nailur ha ka por 2:10 baje mynstep na ïingsah jong u bad ha ka jingbuddien la lap ïa ka na ka shnong Shangpung.
Nalorkata, ka ejahar ka ïathuh ba u Leader Suiam uwei na ki suba donkti, u phla ba ki pyndonkam da ka Maruti Swift Tourist kaba don ïa u nombor ML05-AD-3404 na ka bynta ban leh ïa kane ka kam tuh.
Halor kane, ki pulit mar-mar ki la pynlong ka jingtohkit bad kem noh ïa kitei san ngut bad ruh ban kurup noh ïa katei ar shaka. Kine san ngut ki dei ruh kiba donkti ban tuh ïa kawei ka ar shaka na Assam.
