New York, Nailur:
Ka Consulate General jong ka India kaba don ha New York, ka la pynrem jur ia ka jingshah pynjulor jong kawei ka jaka mane ki jaitbynriew Hindu kaba don ha New York da kaba ong ba ka la rah ia katei ka mat sha ki bor aiñ jong ka US na ka bynta ban pynkloi ia ka jingtohkit ia kiba don kti ha katei ka kam ibeiñ jaitbynriew.
Katei ka tnat ba dei khmih ia ki nong India ha New York, ha ka Sngi Nyngkong ka la ong ba katei ka jingpynjot- pynjulor ia ka BAPS Swaminarayan Temple kaba don ha ka thaiñ Melville jong ka nongbah New York ka long ka kam thombor bad ka jing-leh ibeiñ jaitbynriew ka bym lah ban pdiang. Kumta ruh ka la dawa ia ki bor pynïaid ka New York ba ki dei ban shim khia bad ban pyntikna ia ka jingshngaiñ jong ki nong India kiba don ha katei ka nongbah bad ha katei ka ri hi baroh kawei namar ka long ka jingma kaba khraw lada ki jaitbynriew nong India kin shah leh ibeiñ ha katei ka rukom.
Ka tnat Consulate ka la pynrap ruh ba ka don ka jingiadei kaba kyrpang bad ki paidbah nong India ha katei ka ri bad kumta ka la dep ban rah ia kane ka mat sha ki bor aiñ jong ka US ban shim jingkit khlieh bad ban pyntikna ia ka shongsuk- shongsaiñ bad ka jingburom ia ki jaitbynriew nong India kiba don ha US.
Ka thaiñ Melville ka don hapoh Suffolk County jong ka Long Island bad ka jngai kumba 28 Kilometre na ka Nassau Veterans Memorial Coliseum kaba la pynkhreh ban pdiang burom ia u Myntri Rangbahduh ka ri India- u Narendra Modi ha ka jingleit jong u sha katei ka nongbah, ka ban long ha ka 22 tarik u Nailur.
Namar la ong ba katkum ki dur ba la saphriang bad iohi lyngba ki ‘Social Media’, kitei ki briew ki bym don jing-ithuh ki la leit ban thoh ia ki jingthoh shabar jong katei ka jakamane da ki jingthoh kiba kren beiñ bad byrngem-byrsit ia ki jaitbynriew Hindu kiba don ha katei ka thaiñ.
Namarkata, ka Hindu American Foundation ka la dawa ia ki bor ka aiñ jong ka US ba ki dei ban shim khia ban pyntikna ia ka shongsuk-shongsaiñ bad ka jingshngaiñ jong ki paidbah nong India kiba don ha katei ka ri kumba ka India ruh ka ju burom ia kiwei pat ki jaitbynriew ba nabar ka ri India haba ki leit ban shong- sah hapoh ka ri India.
