Shillong, Nailur 18
Ki Nongïalam ka National People’s Party (NPP) Pynursla Block, East Khasi Hills district ha ka Sngi Balang ki la ïathuh ba u MLA jong ki, u Bah Prestone Tynsong uba dei u Symbud Myntri Rang-bah ka jylla u don hapdeng ka met kaba koit ba khiah.
U President ka NPP Pynursla Block, Bah E Khongsti, u la ïathuh ba ha kine ki khyndiat sngi ki la leit sha Nongbah Delhi ban leit ïakynduh ïa u MLA Bah Prestone Tynsong khamtam hadien ba ka mih ka khubor ba u ïoh ka jingpang kaba kynsan-kynsan bad ha ka jingleit jong ki, ki shem ba u MLA u la don hapdeng ka met kaba koit ba khiah. Na ka liang u Working President ka NPP Pynursla Block, Bah Holiwell Khongstid, u la ïathuh ba u Bah Prestone u la don ha ka met kaba koit ba khiah bad mynta un dang sah sa katto-katne por ha Delhi ban leh ïa ki jingdonkam bad shen un sa wan phai noh sha ka jylla.
U la ïathuh ruh ba na ka liang u Bah Prestone u ai khublei kyrpang ïa baroh ki paidbah ka jylla bad khamtam ki paidbah ka Pynursla Constituency kiba la kynmaw kyrpang ïa u da ki jingduwai ba un ïoh ïa ka met ka phad kaba koit ba khiah, ka jingduwai jong baroh ki paidbah ka aibor shuh shuh ïa u bad mynta u la ïoh ïa ka met kaba koit ba khiah.
U la bynrap da kaba ong ba u MLA u don ka jingkynmaw ïa ki paidbah, kiba la lynga bad pisa na ka jingkem pang ba kynsan jong u, hynrei mynta u Bah Prestone u phah ka khubor ban ai khublei sha baroh kiba la duwai na ka bynta jong u bad U Blei u dang kyrkhu ïa ka ïing ka sem jong ki baroh. Haba ïadei bad ki jingkynthoh (comment) kiba kren tohmet ïa u Bah Prestone, kitei ki nongïalam ki la ïathuh ba ki sngewsih ban ïohi ïa kum kine ki jingkynthoh ha ki rynsan social media hynrei haba ki ïakynduh ïa u MLA jong ki, u pynpaw da kaba ong ba kim dei ban sngap namar kum ki briew ki don ka jingbakla bad kim dei ban sngew eiei.
Kine ki nongïalam NPP ki la pynpaw ba kum ki briew shibun ki jingduna ki don, hynrei ai ba U Blei un pynshai ïa ki ba kin long kiba tip-briew tip-blei bad ban burom ïa ka imlang ka sahlang bad kum u MLA um shym la buhnud hynrei ai ba U Blei un kren ba kin ïoh ïa ka jingkylla bad ban neh ban skhem kum ka ri tip-briew tip-blei ka ri tip-kur tip-kha.
