Shillong, Nailur 18
Ka North East Institute of Fashion Technology (NEIFT) ha kine ki khyndiat taïew ba la dep ka la pynlong ïa ka tamasa kaba heh ba la tip kum ka North East India Festival kaba 19 ha ka 6 tarik u Nailur 2024 ha Istanbul jong ka Ri Turkey. Kane ka tamasa ka long ka bynta kaba kongsan tam na ka bynta ban pynkiew ïa ka thaiñ shatei lam-mihngi ka Ri India la ka long ha ki kam jngohkai pyrthei, kaba suh bad thaiñ jaiñ bad ki jingshna kti la jan ar pateng bad kiba dang iai bteng haduh mynta mynne bad kaba pyni ruh ia ka jingriewspah jong ka riti ka dustur ha ki rynsan bapher bapher shabar jong ka Ri. Ïa ka North East India Festival la pynlong da ka North East Institute of Fashion Technology (NEIFT) lyngba ka jingkyrshan jong ka sorkar India bad sorkar Meghalaya lyngba ka tnad Tourism bad ki briew kiba ïa don bynta na ka bynta ban pynkiew ia ka riti ka dustur, ka rwai ka siaw, ka tem ka put bad ki jaiñ ki nep jong ka thain shatei lam mihngi ka Ri India.
Ka jingthmu jong kane ka tamasa ka long ban pyninam ïa ka jingnang bad shemphang jong ki nongpynwandur ïa ki jaiñ bad kiwei pat ki kam jong ka thaiñ shatei lam mihngi ka Ri India.
Hapdeng jong kine sngewtynnad pat ban tip ba ki samla hapoh kawei ka kynhun kiba kynthup naduh kiba na ka jylla Meghalaya bad ka thaiñ shatei lam mihngi hi baroh kawei ki ïoh ïa ka lad ban mihkhmat ïa la ki jong ki jong ki jylla ha ryngkat la ki riti ki dustur shabar jong ka Ri ban pyni ïa ka jingriewspah jong ki jylla bapher bapher hapoh ka thain. Napdeng kine ka jylla Meghalaya ka la phah ruh ïa u nongsuh bad nongpynwandur ïa ki jaiñ uba la tbit bad shemphang bha ha ka kam u samla Daniel Syiem uba don la ka jong ka karkhana ban shna bad pynwandur ïa ki jaiñ (designing clothes) ïa kaba la ai kyrteng ka Daniel Syiem Ethnic Fashion House kaba don ha Lower Lachumiere Shillong lem bad ka nongsuh bad nongpynwandur ïa ki jaiñ na Garo Hills ka Moryca Marak ha ryngkat ka model na Garo Hills ka samla Tanvi Marak, bad ka kaitor ba paw ka jylla Meghalaya ka samla Lily Sawian kiba la ïashimbynta ha ki prokram bapher bapher kumba la bynta ia ki.
U Samla Daniel Syiem u la pyninam ïa ki thup jaiñ (collection) jong u ïa kiba la ai kyrteng Ryndia Chronicles kaba pyni ïa ka jinglong kyrpang bad kongsan jong u ksai Ryndia da kaba suh bad pynwandur ha ki jaiñ ha ryngkat ka jingthmu ban pynneh pynsah ïa kine ki ksai tynrai kiba la sdang ban shah tyllep bad iehnoh shadien lyngba ka jingmih jong ki ksai mynta. La ong ruh ba u samla Daniel u la shim na ki snep jong u khñiang ryndia bad u la suh pynwandur ha ki jaiñ na ka bynta ban pynitynnad bad pynïapbiej ïa kiba peit bad ïa kane u la leh lyngba ka jingïohi jngai jong u kat haduh ba u la ïohlad ruh ban pynmih ïa ka Ryndia Chronicles.
“Kane ka long kawei na ki tamasa kaba sngewtynnad tam ha ka jingim jong nga, namar baroh napoh ka jylla ki ïatreilang kum ka kynhun ban pynlong ïa kane ka jingthmu kaba jop bad ki briew na ki Ri bapher bapher ki ïapbiej ïa ki jaiñ jong ngi bad kaba nga da sngewhun eh ka long hadien ba uwei u nong Amerika u la ïohi ïa ka show baroh kawei da kaba ong ba u don ka jingpyrkhat kaba pher ia ka India hynrei hadien ba la iohi lut ia kiei kiei ula kylla noh ka rukom pyrkhat ia ka India,” la bynrap u samla Daniel Syiem.
Katba ka samla Lily Sawian pat ka la pynbyrngia ïa ki paidbah kiba la ïadonlang ha ka tamasa jong ka North East India Festival lyngba ki jingrwai phareng bad Khasi ha ryngkat kiwei kiwei ki nongïashim bynta. Na ka liang ki samla kiba la mihkhmat ïa ka jylla Meghalaya ki pynpaw ka jingkhublei ïa ka sorkar jylla lyngba ka tnad jngohkai kaba kynthup ruh ïa u Director jong ka tnad Tourism Bah Cyril V Diengdoh, u CEO ka NEIFT u Vikram Rai Medhi nongpyniaid jong ka NEIF, u Consulate General of India, Istanbul u Mijito Vinito bad ruh ïa ka Kong Racheline Shadap bad u kurim jong ka, u (L) Virander Paul, Ambassador sha ka Ri Turkey na ka bynta ki jingiarap bad ki jingkyrshan ba radbah jong ki.
