New Delhi, Nailur:
U Myntri Rangbahduh ka ri India, u Narendra Modi, ha kane ka taiew ban wan un sa leit jngoh sha United States na bynta lai sngi lynter ka ban sdang naduh ka 21 tarik haduh ka 24 tarik jong une u Nailur. Kane ka long ruh ka sien leit jngoh ban iadon bynta ha ka jingialang Quad Summit, kaba ju long man la u snem bad kumjuh ruh ba un leit ban ai jingkren ha ka ‘Summit of the Future’ jong ka UN General Assembly.
Ka Quad Leaders’ Summit kaba saw, ka ban long ha Wilmington, Delaware, la pynlong da u President jong ka America, u Joe Biden. Hynrei la ong ba ka India pat kan sa pynlong ia ka jingialang Quad Summit kaba heh bah bad ka ban sa long ha u snem ban wan (2025), katkum ka jingpynbna na ka tnat Ministry of External Affairs (MEA) ha ka Sngi Ba-ar.
Katei ka jingialang jong ka Quad, ha kaba yn iashim bynta ruh da ki nongialam jong ka Australia bad ka Japan, kan long ka jingiakynduh khublei ia U President Biden, u byn ym ïakhun shuh ha ka ilekshon President ha kane ka sien bad kumjuhr uh kan long ka jingkhublai khatduh ia u Myntri Rangbahduh ka Japan, U Fumio Kishida, uba la thmu ban iehnoh ia ka kam ha une hi u snem.
Ka Quad ka dei ka jingiatreilang hapdeng ki saw tylli ki ri, kiba kynthup ia ka ri Australia, ka India, ka Japan bad ka United States bad la ong ha kine ki snem ba la dep, ki Myntri bar ri Quad ki la iakynduh 8 sien bad ki nongialam jong kane ka kynhun Quad ki dang iai bteng ban iakynduh bad ban iatreilang ha baroh ki kyrdan naka bynta ka bha- ka miat ha kitei ki 4 ri bad kumjuh ruh ban wanrah ia ka bha- ka miat ha ka pyrthei lang baroh kawei.
Hadien ka jingkyrpad na ka liang jong ka US ban pynlong ïa ka Quad Summit mynta u snem, ka India ka la mynjur ban pynlong ïa ka Quad Summit ha u snem 2025 ban wan. Ha kane ka Quad Summit, ki nongïalam kin bishar bniah ïa ka jingkiew bad ka jinglong-jingman ki kam ki jam ha kine ki 4 tylli ki ri jong ka kynhun Quad ha kine ki shisnem ba la leit.
Kumta, ha kane ka sien, la ong ba u PM Modi un ai jingkren ruh ha ka ‘Summit of the Future’, ha ka jingialang kaba heh bha jong ka United Nations ha New York ha ka 23tarik Nailur bad ka phang pdeng jong katei ka jingialang ruh ka long ban iamir jingmut bad ban ai jingmut kumno ban wanrah ia ka lawei kaba bha.
Shuh shuh ruh la ong ba katba u Modi u dang don ha New York, un sa leit pat ban ai jingkren ruh ha ka jingïalang jong ki nong India ha ka 22 tarik u Nailur bad un sa ioh ban iakren bad ki CEO jong ki kompeni ba pawkhmat kiba don ha US ban kyntiew ïa ka jingïatreilang kaba kham khraw hapdeng kine ki ar tylli ki ri ha ki bynta jong ka AI, ka quantum computing, ki semiconductors bad halor kiwei de ki bynta kiba kongsan katkum kane ka juk ba mynta.
